Otmar Oduber:
ORANJESTAD (AAN): Den un entrevista cu prensa e siman aki, Otmar Oduber, kende ta ex-parlamentario di PPA y actual consehero di fraccion di PPA, a indica den su ponencia fuerte den e reunion publico riba Rijkswet HOFA, lider di Partido Patriotico Arubano (PPA) Otmar Oduber a pone e situacion claro y fuerte: “E discusion di HOFA, mi no kier bay den ken a firma of no, mi kier papia di un proceso cu ta falta di respeto pa Parlamento y pa pueblo di Aruba.”
Oduber a recorda cu e reunion cu PPA a pidi desde 30 di januari finalmente a tuma lugar awe, despues di siete di silencio, un señal cla cu ta falta di democracia y transparencia den nos sistema Parlamentario
Un mocion cu ta traiciona e pueblo: Durante e reunion di diamars, tanto fraccion di AVP y FUTURO a entrega un mocion caminda nan ta reconoce e Bestuurlijk Akkoord cu a worde firma na 2024 pa ex-prome minister Evelyn Wever-Croes. “Lesa bon loke ta den e mocion: nan ta vocifera cu Parlamento di Aruba ta di acuerdo cu e mesun acuerdo cu Hulanda y ta reconoce oficialmente un firma, cu a tuma lugar sin consenso nacional,” Oduber a enfatisa. Segun Oduber, esaki ta un acto di contradiccion y rendicion politica, paso e mesun partidonan cu semper a bisa cu Aruba no por sali for di HOFA door di e carta di 2024, awor nan mes ta ratifica cu Parlamento ta di acuerdo cu esaki.
“Esey no tin pia ni cabes. E ta pura politica y un traicion di pueblo,” Oduber a agrega.
Sin Respet: El a bisa cu e tabata un proceso sin decision di Gobierno, sin respet pa Parlamento. Otmar a referi na un documento crucial: e instruccion di Hulanda cu a sali for di Secretario di Estado y cu, segun e data oficial, a yega na un acuerdo cu Gobierno di Aruba riba 13 di augustus 2025, trata den Rijksministerraad di 29 di augustus.
“Con por ta, cu un miembro di Parlamento mes, incluso esunnan cu ta sostene gobierno, ta acepta cu no tabatin un decision di Conseho di Ministro di Aruba prome cu manda e acuerdo aki?” Oduber a puntra con firmeza.
“Ken ta e minister cu a manda esaki sin aprobacion di Conseho di Ministro? Bo no por pone nada riba agenda di Ministerraad sin decision formal.” Oduber a subraya cu e proceso aki ta ilegitimo y desorganiza, caminda Tweede Kamer na Hulanda a worde informa, pero Parlamento di Aruba, e representante legitimo di pueblo di Aruba, no a haya niun documento oficial.
Ley di HOFA: Un ley cu ta tuma mas cu loke ta duna. Segun Oduber, HOFA no ta un ofrecemento di ayuda, sino un instrumento pa controla Aruba.
“Bo ta papia di 24 miyon Florin pa aña, pero bo ta entrega bo autonomia constitucional. Esaki ta un transaccion cu ningun pueblo orguyoso por acepta.”
El a enfatisa cu si Aruba kier financia un fondo pa enseñansa of otro proyecto, segun e ley aki mester bay pidi permiso na Hulanda. “Esaki ta elimina independencia financiero di Aruba. Y esey no ta progreso, esey ta retraso.”
Un yamada Final: Uni forsa y para firme pa Aruba. Otmar Oduber a gradici e 16 gremionan sindical y comercial cu a firma pa para pa un solo vision: Aruba. No tin tempo pa perde y segun Oduber a enfatisa, tin dos caminda so pa Aruba:
- Manda un mocion cla den Parlamento cu Aruba no ta di acuerdo cu HOFA y busca un mayoria pa sostene e posicion nacional.
- Uza e via legal di articulo 15 y 16 di Statuto di Reino, via un nota oficial di nos Minister Plenipotenciario, pa pone Aruba su obheccion formal den Tweede Kamer y Conseho di Reino.
Sinembargo Oduber a adverti, cu sin un Minister Plenipotenciario activo, Aruba ta worde pone den un posicion di “schaakmat”, sin bos ni voto real den Reino. “Ta ora pa nos tuma control di nos destino mes. E autonomia di Aruba no ta un fabor, ta un derecho cu nos antepasadonan a gana cu lucha y sacrificio. PPA lo sigui para firme pa Aruba, pa su pueblo, y pa su dignidad.
“Nos no ta bay entrega Aruba pa miedo ni pa promesa politico. Ta ora di para firme y uni forsa nacional pa defende nos autonomia, nos constitucion y nos futuro.” Otmar Oduber, lider di PPA a finaliza bisando.
