Segun Parlamentario Independiente Gerlien Croes:
ORANJESTAD (AAN) — Cu na e momentonan aki parlamento di Aruba ta den recess, pero esey no ta nifica cu no tin preparacionnan caba, pa locual ta na caminda pa e miembronan di Parlamento.
Asina e Parlamentario Independiente, Gerlien Croes a menciona den entrevista cu DIARIO.
El a indica cu manera ta conoci cu, probablemente, pronto lo entrega locual ta e presupuesto pa aña 2025. Poco prome cu Parlamento a drenta den recess tabata tin un conseho di CAft cu a sali, tocante loke gobierno a presenta na nan caba.
“Nos ta wak enberdad un presupuesto cu ta presenta un surplus di 150 miyon florin, cu por bisa ‘epa, cos ta bay hopi bon na Aruba’ pero alavez tambe tin hopi pregunta. Esaki pasobra den e conseho di CAft e ta haci e pregunta na gobierno di Aruba, con pa pasa un ley caminda bo ta determina cu tur surplus cu bo tin, bo ta bay los af na locual ta bo debe. Mas bo baha bo debe, mas espacio financiero bo ta crea pa e pais estabiliza y alavez tambe eventualmente bo ta inverti mas cu e pueblo por sinti mas e beneficio di e entradanan aki. Pero ya caba nan ta cuminza na bisa cu 92 miyon nan ta bay paga for di e 150 aki, na locual cu nan tin na debe, pero mientras tanto e gastonan di gobierno ta bay subi cu 40 miyon, gastonan di personal ta subi cu 51 miyon, entre otro. Anto, bo ta puntra bo mes na unda e prioridadnan ta y kico ta sosodiendo?”
Gerlien a agrega cu gobierno na e momentonan aki ta empoderando su mes, segun nan, door di hinca mas hende den e aparato gubernamental, pero e pueblo mes no ta hayando e beneficio di loke ta e entrada aki.
“E ta un lastima pa bisa cu ora nos wak loke ta wordo presenta, ta papia di inversionnan cu lo mester tuma lugar di awo pa 2029, pero CAft, repetidamente, ta puntra gobierno si e ta papia di inversion. Bo no ta presenta un plan di inversion. Pueblo ta wak hotelnan cu ta lanta mescos cu padestoel cu ta bay causa mas peso riba locual ta structura social, structura di Aruba, por lo general y na final di dia, locual nos ta realiza nos mes ta cu no tin proyectonan na e momentonan aki den planning, pa inverti y cu nos bisa cu enberdad por wak un cambio riba e pais aki”, Parlamentario Gerlien Croes a señala.
