Edgard Vrolijk, Presidente di Parlamento
*Apelacion na oposicion pa coopera
ORANJESTAD (AAN): Presidente di Parlamento, Edgard Vrolijk a expresa cu e caso di Benny Sevinger ta uno excepcional den Reino. El a menciona cu por ehempel, na Sint Maarten, nan tin regla den nan Constitucion cu ora un parlamentario haya su mes envolvi den un caso, cu e por bira sospechoso mes y cu e persona aki ta bandona sala di Parlamento y un otro parlamentario mester por coy su luga.
Vrolijk a sigui bisa cu na Aruba den Constitucion no tin esey. Den esey mester dos tercera parti y hasta a purba lanta un comision pa atende cu esaki pero no a haya cooperacion di oposicion den parlamento. A agrega cu e 11 parlamentarionan den coalicion no lo pasa nunca un cambio den Constitucion unda cu mester dos tercera parti.
Presidente di Parlamento a indica tambe cu esey ta e caso di Benny Sevinger a bay casacion y tin cu sigui un trayectoria como Parlamentario, locual ta di lamenta. E ta keda na Parlamento di Aruba pa haci e cambio ey y tanten cu no haci e cambio ey, den futuro, cualkier hende cu bira sospechoso of cu wordo condena mes cu cana full su proceso no por sac'e di Parlamento tanten cu e mes tin e decencia di bandona sala di Parlamento y tuma su retiro.
Esaki ta nifica cu di 21 parlamentario, 10 ta di acuerdo pa e parlamentario sinta den Parlamento di Aruba. A lanta un Comision di Integridad, Vrolijk a laga sa, pero no a haya e cantidad di miembronan pasobra eyden tin 10 miembro y e cantidad di miembro mester ta di oposicion tambe y si no tin miembro no por sigui cu esey. Un di e motibonan tabata cu kier trece cambio. No solamente bin cu codigo di conducta, pero tambe cu cambionan pa locual ta Constitucion caminda dos tercera parti ta busca un manera pa un persona cu ta sospechoso mester por bandona sala di Parlamento.
A indica cu esaki tambe ta conta pa minister. Aworaki tin un ley di integridad di minister y ora cu tin un minister sospechoso e tin cu bandona su funcion. Den e caso aki kier a haci algo similar, pero no a haya cooperacion di oposicion y mester di dos tercera parti pa por cambia Constitucion y esey no ta e caso.
Pesey ainda Benny Sevinger ta sinta den sala di Parlamento, Edgard Vrolijk a duna di conoce. Cu esaki ta mandando un mensahe eroneo eyfo pasobra for di comienso, ora un persona cu caba tabata sospechoso drenta parlamento, ya caba ta un señal eroneo pa locual ta un 'Hoge College van Staat' unda cu integridad mester ta halto, a remarca.
Presidente di Parlamento ta haci un apelacion na esnan den oposicion pa lanta e comision awo cu Aña Parlamentario ta habri bek p'asina haci e cambionan corecto y eleva e nivel den Parlamento. "Ta keda na e parlamentarionan pa haci e cambionan aki".
