MEP ta manda prome recordatorio:
ORANJESTAD (AAN): Fraccion di MEP a manda e siman aki, un prome recordatorio na Minister President di Aruba, relaciona cu e carta anterior cu preguntanan pa gobierno Hulandes tocante e anotacionnan personal di Reina Beatrix: “Tijd winnen! Hij zal eens wegvallen. Dat afwachten.”
E palabranan aki a habri heridanan profundo di nobo na Aruba. E famia di Betico Croes ni e pueblo di Aruba no a pidi pa esaki. Pero awor cu e anotacionnan aki a bira publico, Aruba tin tur derecho pa sa kico tabata kiermen cu nan, ki informacion tabata disponibel na e momento ey y si tabatin scenario of draaiboek prepara pa percura cu Betico Croes lo a ser elimina como figura politico di Aruba.
Desde principio, MEP a enfatisa cu e preguntanan aki no ta pa specula, sino pa haya claridad historico y transparencia.
E pueblo di Aruba ta exigi contesta. Minister President di Aruba Mike Eman no por laga nos pueblo sin contesta riba e preguntanan serio aki. Ta su responsabilidad pa trata e asunto aki cu e seriedad cu e merece y pa insisti activamente cerca di gobierno Hulandes pa haya aclaracion.
Keda keto no ta elimina e dudanan. Al contrario: e ta haci e situacion mas grave y ta aumenta e desconfianza.
Aruba tin derecho di haya claridad riba su propio historia. MEP lo sigui exigi contestanan.
