Segun lider di PPA, Otmar Oduber:
ORANJESTAD (AAN)-- Segun e Lider di Partido PPA, señor Otmar Oduber, Aruba practicamente bao di maneho di AVP-Futuro, ta den un dictadura. Oduber ta lamenta cu na Aruba no tin un liderazgo, no tin un vision pa nos pais. Pero tin un operacion di dictadura ta tumando luga, tanto den gobierno y den parlamento.
Oduber a expresa: “Nos tin un gobierno ya caba pa dos aña cu no tin liderato ni tin un direccion. Bo ta papia cu no tin respet pa Parlamento, of cu no tin respet pa comunidad ni pa nos gremionan, mira con un rapport a wordo traha di turismo, caminda cu AHATA cu ta e organizacion di turismo mas grandi na Aruba, no a wordo scucha. B’a sinta cu ne, pero manera nan mes ta bisa ‘bo a tuma mi pa haci espectaculo. Bo no a inclui loke mi a trece’. Y esey ta sosode ora bo no tin un vision. Ora bo no tin un plan, ora bo no sa unda bo kier hiba e pais aki. Y si! Asina dictaduranan a cuminza. Asina ey, ora bo no ta respeta bo Parlamento, of ora den Parlamento su Presidente ta kita bos, cera volumen cera microfon, di un miembro di Parlamento, esey ta comienzo di e final”, Otmar Oduber a subraya.
El a sigui bisa cu esaki ta wordo mira tur dia. “Nos ta mira cu den Parlamento tin un dictadura di parti di e presidente di Parlamento. No ta kita nada na abo, pa permiti oposicion haci su trabao. Mas ainda ora bo mira con cantidad di bez coalicion ta duna, na final di dia, sosten of mediante otro mocionnan cu ta wordo presenta door di oposicion, via mocionnan cu ta wordo traha door di coalicion. Pero na e momentonan aki, nos mira e situacion di pais Aruba, con nos hendenan ta bibando, hendenan no tin placa pa biba, costo di bida ta haltisimo, gobierno ta sigui gasta, nan no ta baha gasto; nan ta ricibi mas placa, nan tin surplus, pero e pueblo aki no ta wak na unda e placa a bay y riba dje, no ta atendiendo cu e problematica di Pais Aruba”, segun e lider di PPA.
Oduber a sigui bisa cu fuera di e par di anuncionnan sin pia ni cabes di gobierno, ki ora cu por mira e gobierno aki den un rueda di prensa, ta pa anuncia e siguiente fiesta cu ta bay tin e luna ey. El a señala cu e gobierno aki ta esun di un minoria mas grandi cu nos a conoce den e ultimo binti añanan di e pais aki. “No lubida, e gobierno aki ta sinta cu menos di 40% di voto di pueblo. Kiermen 62% di e pueblo aki a vota contra e gobierno aki, entre esnan cu ta na Parlamento y esnan cu no a logra drenta Parlamento.
Corda cu 62% di e pueblo aki a vota contra Futuro y AVP. Y mi ta reitera: ‘un pais sin liderazgo ta mescos cu un famia sin cabes na cas. Y esey ta loke ta pasando na e momentonan aki”, Otmar Oduber, lider di PPA, a expresa y a finaliza bisando: “Candela tur caminda na Aruba, anto Prome Minister ta keiro pa dispidi di un gobierno, cu mi ta kere ta bay ta e gobierno cu pasa na historia cu a duna menos atencion pa e comunidad di Aruba”.
