Parlamentario John Hart (AVP):
ORANJESTAD (AAN) – Den su rol como miembro di Parlamento, John Hart ta pidi atencion urgente pa falta di transparencia den varios desaroyonan gubernamental cu ta impacta directamente e futuro di Aruba.
Den su declaracion diamars, durante e conferencia di prensa semanal di fraccion AVP, Hart ta enfatisa cu e mensahe di e partido berde durante campaña—fe, speransa y amor—cu en berdad ta fundamental, pero el a agrega un di cuater elemento: investigacion.
“Nos tin cu investiga loke no a bay bon. Nos no por siga mira pa otro banda ora cu señalnan ta cla,” Hart a bisa. Su preocupacion ta basa riba diferente desaroyonan reciente, incluyendo e caso di Aruba Wastewater Sustainable Solutions (AWSS), nombramento den directivanan di WEB y e falta di claridad tocante e proyecto di transicion energetico, particularmente e caso di Eagle LNG.
Hart ta sinti cu na Parlamento tin un ambiente cu ta indica cu cosnan no ta wordo comunica manera mester. “Mi ta kere cu pueblo di Aruba tin derecho di sa kico ta tuma luga. Como parlamentario, mi trabou ta yama e minister aden y pidi un reunion cu contenido riba tur e asuntonan menciona.”
Na nivel di pueblo, Hart ta referi na e preocupacion cu hende ta expresa den e bario. “Hendenan ta para mi riba caminda y bisa: ‘señor Hart, for di 2021 nos ta tende cu tin un proyecto di Eagle LNG. A firma un acuerdo historico, pero awor ta 2025 y nos no sa nada.’ Esaki no por sigui asina.”
Hart ta manda un yamada firme pa un parlamento cu ta vigila, investiga y defende e interes di su pueblo. “Nos no ta aki pa sigui silencio. Nos ta aki pa hiba claridad y responsabilidad bek na caminda.”
