Otmar Oduber:
ORANJESTAD(AAN): Hopi hende tabata pendiente pa e resultado di e caso cu candidato pa minister Mike de Meza a entama contra Servicio di Impuesto, relaciona cu su comportacion fiscal.
Despues cu Diaranzon mainta huez den su veredicto a skirbi cu corte den e caso aki no por tuma un decision y cu esaki ta keda den man di Formador, lider di PPA y parlamentario Otmar Oduber a duna un reaccion.
Dilanti di Parlamento Oduber a indica cu ta hopi importante pa para keto na e sentencia.
“Ta mas cu 6 luna pasa cu tabata tin un eleccion y ainda nos no tin un gobierno forma completamente y no ta carga e responsabilidad total”.
Na prome lugar e ta un berguensa y ta mustra e incapacidad cu tin pa goberna.
Nos a mustra riba e hecho aki y e sentencia di awe ta exactamente loke mi a trece pa dilanti siman pasa, segun Oduber.
El a sigui bisa cu ora cu bo lesa locual hues a trece pa dilanti bo ta ripara cu no a duna rason na de Meza.
“Ta mas cu logico cu e no a duna rason na de Meza, pasobra ta un ley cu a pasa den Parlamento di Aruba a pone e reglanan ki ora bo por bira un minister”.
E tristo di e caso ta cu Mike Eman y Gerlien Croes tabata sa di e ley aki, esta e dos Formadornan.
E pena cu nan a pone de Meza pasa door di dje awe den corte ta algo cu nunca mester a sosode, segun e lider di PPA.
El a sigui bisa cu si tabata tin confianza den de Meza e tarea y responsabilidad di señor Eman y di señora Gerlien Croes como Formadornan di Gobierno tabata di presenta e candidatura di Mike de Meza na Gobernador di Aruba.
Segun Oduber, Gerlien Croes no por djis bisa cu e no ta Formador mas y cu tin cu wak den direccion di Eman.
“Tur hende na Aruba sa cu Gerlien Croes ta esun cu no kier Mike de Meza como minister”.
Door cu Eman no tin e curashi ni e confianza tampoco den su number dos riba e lista, e no tabata tin e capacidad y no tabata tin e intencion tampoco di presenta de Meza como candidato pa bira minister, segun Oduber.
El a sigui bisa cu Eman a conta riba e hecho cu hues lo bay haci su trabao pe y bisa cu de Meza no por bira minister.
Sinembargo, huez a pone tur cos den man bek di Eman.
“Eman a base di e consehonan cu el a ricibi for di e diferente instancianan, su trabao tabata pa presenta of no presenta de Meza como candidato pa bira minister”.
Sinembargo, el a manda de Meza bay muri den corte, segun e lider di e partido Oranje.
