“Proteccion di nos muchanan mester ta garantisa pa henter e sistema funciona”

“Proteccion di nos muchanan mester ta garantisa pa henter e sistema funciona”

Parlamentario Eduard Pieters:

ORANJESTAD (AAN): Kico ta e balor di un sistema di proteccion di mucha, si un victima di abuso no haya e sosten necesario, si e instancianan no ta traha suficientemente hunto y den harmonia y si e proceso hudicial no ta logra ofrece un contesta adecuado na e gravedad di e delito pa un condena pa bida largo?

Esey ta e preocupacion cu parlamentario y lider di fraccion di Partido Patriotico di Aruba (PPA), Eduard Pieters, a pone central durante e di dos tanda di consulta cu e organisacionnan cu ta traha diariamente cu mucha y hoben, particularmente den e casonan di negligencia, maltrato fisico, emocional y abuso sexual.

E reunion ta forma parti di e iniciativa di PPA, pa examina posibilidad di reinforsa e castigonan pa e delitonan grave contra menor di edad, incluyendo aumento di castigo minimo y evaluacion di posibilidad di castigo di prison pa bida largo.

Castigo mester refleha gravedad di delito

Segun Pieters, ora un mucha ta victima di abuso, e sistema hudicial mester reconoce gravedad di e daño causa y garantisa cu e caso ta haya tratamento serio. Pa e parlamentario, un castigo proporcional na gravedad di e delito ta importante, no solamente pa responsabilisa e agresor, sino tambe pa contribui na e reconocemento cu e victima merece. Sinembargo, Pieters a enfatisa cu e consulta no a limita su mes na proposicion di e castigonan mas severo. E organisacionnan participante a comparti nan experiencia, nan preocupacionnan y e obstaculonan cu nan ta enfrenta diariamente den practica.

Un sistema cu mester traha como un solo cadena

Un di e puntonan central di e encuentro tabata e necesidad di mas cooperacion entre e instancianan cu ta involucra den proteccion di menor di edad.

Pieters a menciona importancia di e scolnan, dokter di scol, dokter di cas, Tienda di Educacion, Jeugdgezondheidszorg, Voogdijraad, Directie Sociale Zaken, Family Justice Center, Meldpunt Bureau Sostenemi y otro organisacion cu ta atende mucha y famia.

Segun Pieters, e meta mester ta pa cada instancia cumpli cu su responsabilidad, comparti informacion conforme ley y contribui na un proceso coordina, for di deteccion di abuso te cu investigacion y tratamento hudicial.

E cooperacion aki ta esencial pa evita cu e victima mester enfrenta e obstaculonan adicional den un proceso, cu ya ta emocionalmente dificil.

Di deteccion te cu sentencia: unda nos por mehora?

Durante e consulta, e participantenan a intercambia idea, no solamente tocante e problematica existente, sino tambe tocante e posibel solucionnan. Pieters a destaca importancia di fortalece e cadena completo, pa e casonan por ta investiga adecuadamente y cu e evidencia relevante y confiabel pa por yega dilanti di hues. E meta ta pa proceso hudicial por conduci na un decision cu base solido, cu respet pa derecho di victima y e garantianan legal di tur persona involucra.

Consulta como base pa medida concreto

Pieters a expresa su agradecimento na e representante- y directornan di e organizacionnan participante, pa nan boluntad y disposicion pa comparti nan experiencia. Segun Pieters, e informacion ricibi lo contribui na formulacion di e proposicionnan pa mehora e sistema di proteccion di mucha, tanto riba tereno legislativo como den cooperacion institucional.

PPA ta considera e consulta un paso importante den preparacion di e medidanan, cu por fortalece prevencion, deteccion, intervencion y responsabilisacion. Proteccion di mucha no ta responsabilidad di un solo ministerio, un solo organisacion of solamente e sistema hudicial. Esaki ta exigi un cadena di institucion, cu ta traha hunto y integral, unda e bienestar y seguridad di menor di edad tin prioridad. Pa Pieters, e reto ta pa transforma e preocupacionnan identifica den accion concreto, pa cada mucha cu ta enfrenta abuso por haya proteccion, sosten y debido acceso na husticia.