Parlamentarionan mr. Vrolijk y mr. Wever- Croes:
ORANJESTAD (AAN)-- Parlamentario mr. Edgard Vrolijk, di Fraccion di Partido Movimento Electoral di Pueblo (MEP), den entrevista cu Matutino DIARIO, a elabora riba su di dos punto cu e kier a trece dilanti den e entrevista aki.
Ta trata aki di e Ley di Studielening, cu su persona hunto cu su colega mr. Evelyn Wever-Croes ta bay entrega muy pronto (aki un siman y mey of dos siman) na Raad van Advies.
“E ta un ley pa cual nos a haya hopi peticion, pa nos studiantenan local y den den exterior. Pasobra e ley di studielening cu tin aworaki ta uno incompleto, y den e caso aki, nos a traha un ley completamente nobo, unda cu ta duna Minister di Finanzas autoridad pa duna studielening, y den esaki tambe, den mesun ley, conhuntamente ta dun’e e posibilidad pa duna dispensacion. Na dado caso nos tabata tin un ley hopi discriminatorio”, Parlamentario Vrolijk a señala.
Vrolijk a sigui splica cu e ta un ley cu tabata duna esnan cu a studia afo, cu a caba scol y a bin bek for di Hulanda, e oportunidad di haya 30% di descuento, si nan paga esaki cash di biaha.
“Kiermen, esaki ta e unico compensacion cu tabatin, y tur otro local, y esnan cu tabata studia afo na otro regionnan no tabata na vigor pa por a goza di e 30% aki.
Naturalmente, prome bo traha un Ley bo tin cu compara bo mes Curacao, Sint Maarten, y logicamente bo tin cu papia cu Departamento Huridico (DWJZ)”, Parlamentario Vrolijk a señala.
Vrolijk a acentua cu intencion semper ta pa yuda nos studiantenan y haci esaki atractivo pa nan bin Aruba bek, pero no solamente pa nos yiunan di tera cu a studia, kiermen no solamente pa esnan cu a studia afo, pero pa esnan cu a studia akinan tambe.
“Pues, esaki ta e prome cambio cu ta bin den Ley. Naturalmente, e ley ta conta pa esnan cu a studia den e region, na Hulanda y na Aruba”, el a remarca. El a sigui bisa cu den e caso aki e ta aplica 50% di dispensacion ora bo caba bo studio, cu directamente por demostra cu bo a caba, cu bo a studia akinan, of esnan cu ta bin di Hulanda, cu a biba na Aruba pa un cierto periodo, si mi no ta hera ta cinco aña, por haya 50% di descuento ‘per direct’, y esey ta haci’e hopi atractivo”, Parlamentario Edgard Vrolijk a indica.
