Parlamentario Ricky Hoek (MEP): Felicitando prensa riba su dia
ORANJESTAD (AAN): Den nos sistema democratico di Trias Politica, tin e podernan legislativo, ehecutivo y hudicial. Prensa ta wordo considera como e di 4 poder den e sistema democratico aki. Prensa ta desempeña un papel indespensabel den un sociedad democratico. Di cual e ta fungi manera un organismo di control, foro publico y educador. Asina prensa por garantisa cu e gobierno ta sigui goberna na un forma responsabel pa su pueblo.
Wowo critico (watchdog)
Prensa ta actua manera un vigilante (watchdog) y ta scrundiña e accionnan di cada gobierno, corporacionnan y otro institutonan poderoso. Na momento di investiga y informa tocante un iregularidad, corupcion y abuso di poder, e periodistanan ta pidi esnan na mando pa responsabilisa nan mes y ta yuda preveni pa esnan na mando pasa nan limitenan.
Foro publico
Prensa ta brinda un plataforma caminda diferente voz por expresa nan mes. Pa medio di articulonan, noticia y editorial tanto e individuo y gruponan por expresa nan punto di bista, debati riba temanan importante y participa den debatenan publico. E intercambio di idea den forma habri, ta esencial pa un democracia saludabel, ya cu e ta permiti tur ciudadano pa participa significativamente den e proceso politico.
Educador
Prensa ta hunga un rol hopi importante den e educacion di e pueblo. Door di duna informacion corecto y imparcial, e periodistanan ta ayuda e ciudadanonan compronde un situacion complica, tuma decision bon funda y participa eficazmente den e bida civico. Otro rol cu prensa tin ta esun di un registro historico. Prensa ta documenta tur acontecimento y ta preserva e memoria di pasado.
Retonan y menasa
A pesar di su importancia crucial, prensa ta enfrenta diferente reto y menasa den e mundo actual. Esakinan ta entre otro:
- Presion economico: e caida den e fuentenan di entrada pa e medionan di comunicacion tradicional a provoca cu tin perdida di empleo, companianan ta cera y un caida drastico di periodismo di investigacion/di calidad.
- Censura: den algun pais na mundo prensa ta wordo censura y restringi e libertad di prensa. Danki Dios na Aruba esaki no ta e caso, pero si tin un situacion contrario caminda cu tin prensa comprometi cu ta bagatalisa tur trabou responsabel di e gobierno actual.
- 'Fake news': door di difundi 'fake news' na forma structural ta dificulta cu e ciudadano no por distingui mas entre e realidad y noticianan falso.
Parlamentario Ricky Hoek ta finalisa felicitando tur prensa riba nan dia!
