Parlamentario Alvin Molina ta opina
- “E prome persona cu e mester condena ta su mes”
ORANJESTAD (AAN): Parlamentario Alvin Molina di Partido MEP, e siman aki a zwaai y manda un bala den ‘strike zone’ di Ministro Ursell Arends.
Segun Molina, esaki ta pasa ora bo ta asina “obsessed” cu integridad, cu bo mes ta lubida di ta integro. E resultado ta un comunicado yena cu manipulacion, mentira y hasta insulto. Ta cosnan cu lamentablemente sa pasa den politica, pero sigur hopi mahos pa un persona cu a nombra su mes e “guru” di integridad.
Djis pa menciona algun: e minister a expresa cu ami a bisa cu integridad no ta un prioridad pa mi. Esey ta un mentira. Loke cu mi a splica ta cu mester pone atencion na un gobernacion integro, bringa contra corupcion, pero cu e meta pa optimalisa e servicio cu ta worde duna na pueblo. Un servicio cu ta percura pa e necesidadnan basico di nos ciudadanonan, por ehempel e cuminda riba mesa, dak riba nan cabes, siguridad riba caya, cuido medico y enseñansa. Tur otro topico, por ehempel economia, finansa publico, turismo, colaboracion, e procesonan vigente, “good governance” y integridad mester contribui na e necesidadnan basico di pueblo y di e forma aki TA prioridad.
Hasta nos minister ta insinua cu nos cuerpo policial no ta educa su miembronan suficiente riba e topico y ta mal uza e lema di KPA pa su manipulacion politico. Minister, kisas bo a yega di atende un “workshop” di integridad. Mi ta sigur cu mi coleganan di KPA ta dispuesto pa dunabo un “refreshment course” y un “upgrade”, “make sure” bo let op bon e biaha aki.
Integridad no ta solamente grita con integro bo ta. Minister por pone un tattoo di integridad mes riba su frenta, pero si den tur bo maneho ta keda imposibel pa demostra con bo ta contribuyendo na e necesidadnan basico di bo pueblo, e ora ey ta ovio cu eigenlijk bo no ta compronde e importancia ni e luga di integridad. Hopi lastima eigenlijk, un guy asina nechi, ta bisti bon, cabey semper strak pela, cutis bunita broncea. Ta su actitud di arogancia y falta di vision ta pomp’e.
