ORANJESTAD (AAN): Miembro di Partido Patriotico di Aruba (PPA) y educador, Sr. Eduard Pieters,
a keda sorprendi cu e expresionnan reciente haci di parlamentario Gino Goeloe di e fraccion di FUTURO. Den un postura firme, pero respetuoso, Pieters a aclara cu loke sr. Goeloe a treci dilanti, no ta refleha e berdad ni e rol constitucional cu un miembro di Parlamento mester tin.
Trias Politica
Segun Pieters: “Ta bon pa para keto un rato y accentua cu den un sistema democratico tin trias politico, cu ta consisti di 3 sorto di poder: poder ehecutivo, poder legislativo y poder hudicial. Un parlamentario tin e poder legislativo, pero den sr. Goeloe su conferencia di prensa el a asumi e rol di poder ehecutivo, papiando como un vocero di e gobierno.”
Fraccion di PPA ta haya cu e postura cu Goeloe a tuma, e ta hiba un mensahe den nomber di Gobierno y ta bruha den e rolnan di parlamento y ehecucion. Esaki sigur ta un accion cu ta debilita mas ainda, e independencia di nos institucion y e confiansa di pueblo den su representantenan elegi.
Constitucion ta cla: Responsabilidad ta di minister
PPA kier enfatisa cu segun nos Constitucion, articulo cirfa Romano 2.1, inciso 3, minister ta esun cu mester responsabilisa na parlamento y no e parlamento mester responsabilisa na pueblo na nomber di gobierno. Si un parlamentario ta sirbi como vocero di gobierno, kico ta keda pa e rol di control, supervisa y legislacion cu e mester eherce den nomber di pueblo?
Den politica nobo nos no mester di un ‘stempel parlement’
Ya ta mas di 120 dia cu a pasa, desde cu PPA a pidi pa un reunion publico pa discuti e contenido y e consecuencia di e Rijkswet. Te awe, Parlamento no a duna respet ni atencion na e peticion aki. “Nos pueblo no kier un stempel parlement mas,” Pieters enfatisa. “E momento a yega pa nos uni y fiha e rumbo di nos autonomia.”
PPA ta propone solucion: ‘Begrotingskamer’
Como un posibel alternativa constructivo, PPA a propone e idea di bin cu un ‘Begrotingskamer’ independiente, ancra den nos Constitucion. Esaki lo ta un mecanismo cu ta evalua, controla y duna conseho ‘bindend’ na Parlamento di Aruba tocante gasto publico. Cada parlamentario lo mester hustifica na pueblo ki postura e ta tuma na momento cu un minister no cumpli cu e cuadro di maneho financiero. Segun Pieters y fraccion di PPA, esaki ta un manera cu Aruba por mustra Hulanda, pero tambe nos hendenan, cu un gobierno ta serio, transparente y responsabel cu su maneho financiero.
Unidad y dialogo: e base pa un politica nobo
PPA ta persisti den su compromiso pa un frente nacional pa uni sector publico cu e gremionan comercial, pa busca solucion riba nivel di pais.
E situacion actual, unda Hulanda ta den un status di gobierno demisionario, no ta beneficioso tampoco, paso e interes di 6.9% ta sigui vigente y ta crea un gran incertidumbre. Aruba no por sigui sinta warda riba Hulanda, sin tin un strategia cla y transparente. Eduard Pieters a conclui: “Esaki ta un momento di liderazgo berdadero. Nos ta boga pa unidad y pa responsabilidad real den nos democracia.”
