Fraccion di PPA:
ORANJESTAD (AAN): Eduard Pieters, miembro di Partido Patriotico di Aruba (PPA), ta lamenta cu e situacion relaciona cu parlamentario Mike de Meza mester a yega te den sala di Corte.
Segun Pieters, e sentencia ta cla: e huez a manda e caso bek na formador, cu ta un señal fuerte cu e proceso no a sigui e regla di integridad, segun e mesun LIM (Ley di Integridad di Minister). Screening basa riba LIM LIM ta cla: si un persona no pasa tur aspecto di e screening, no por postul’e como minister. Sinembargo, segun Pieters, Mike Eman como formador a eligi pa papia cu De Meza pa busca un otro salida, pero eventualmente e a bin bek cerca dje. Esaki a prolonga e situacion innecesariamente, mientras cu Aruba tin reto grandi den infrastructura y energia sin claridad riba direccion of liderazgo.
Falta di liderazgo
Pieters ta cuestiona serio riba e liderazgo di Mike Eman. “Un lider fuerte mester a bisa desde un principio, cu su colega no por bira minister y cu e mester tuma su stoel como parlamentario”. Esaki no a pasa y e consecuencia ta, un proceso cu a degrada e confiansa di pueblo den e sistema politico.
Reflexion y evaluacion di LIM
“Como fraccion di PPA, nos ta kere cu e situacion aki mester sirbi como un momento di reflexion pa tur partido politico y e aspirantenan. Si bo tin ambicion pa bira minister, bo background mester ta limpi y bo mester compronde e spelregels”.
PPA ta insisti pa haya un evaluacion profundo di e LIM, pa mira unda e ta cla y unda tin vacio cu por habri e porta pa situacionnan lamentabel manera esaki. Aruba mester y merece un sistema cu ta basa riba integridad, claridad y responsabilidad.
“Esaki ta nubianan scur den nos procesonan politico. Ta ora pa traha riba un sistema cu ta cla pa tur hende, y no ta depende di ken ta formador of ken bo ta conoce.” Eduard Pieters, di PPA a termina bisando.
