PPA organiza anochi informativo tocante HOFA

* AVP y Futuro no a participa

ORANJESTAD (AAN)-- Lider di Partido Patriotico Arubano (PPA), a tuma e iniciativa di organiza un anochi di informacion den e sede di SIMAR, diamars di e siman aki, 16 di juni, di 6.30 pa 7.20’ or.

E lider di PPA, señor Eduard Pieters a señala cu tur lider di fraccion a wordo invita, pasobra manera semper e ta bisa “informacion ta poder”, y un bes cu pueblo haya informacion e ora ey nan sa unda nan ta para, kico por spera, kico ta e perspectiva pa loke ta e pais Aruba, den cuadro di e Rijkswet HOFA pero tambe di e ley “Landsverordening Waarborging Overheids Financien” (LWHO).

“Lamentablemente nos ta wak cu toch fraccion di Futuro y tambe AVP a dicidi pa no bin, pakico? Pasobra nan a kere cu ta bay ta un debate. Pero, den e carta di invitacion nos a bisa nan cu no ta un debate, e ta pa duna informacion na pueblo, pasobra pueblo p’esaki. Sinembargo, ayera ainda mi a bisa nan cu si ta 5 minuut prome cu 6.30 nan dicidi otro, e invitacion ta sigui riba mesa, nan por bin y presencia y duna informacion na pueblo, cu  pueblo tanto ta anhela, tanto di e disputanan cu tin den pueblo, tocante e HOFA aki. E meta  principal ta pa nos por duna informacion”, lider di PPA a indica.

El a agrega cu Lider di Partido MEP a acepta e invitacion, y Fraccion di PPA tambe di su banda a duna informacion, logicamente usando e conseho di Raad van Advies riba ambos ley rijkswet y LWHO, pero tambe Raad van Staten, ultimamente tambe a duna conseho riba e Rijkswet HOFA.

Señor Pieters a mira cu satisfaccion e momento cu e comerciantenan a cuminza yega SIMAR, pasobra e ta kere tanto den informacion como den educacion, como un educador cu e ta.