Relato AVP scuchando tur voz den bario:
ORANJESTAD (AAN): Sonia Westerburger ta un pensionado di 86 anja di edad. Riba un Diadomingo atardi e a habri porta di su humilde cas na Tarabana pa dirigentenan di AVP topa e bario. Sonia a invita su amistadnan den bario cu ta confrontando e mesun retonan. Costo di bida a bira impagabel y den bario esey ta tema cu mas ta domina e combersacionnan.
Na Bushiri tambe ciudadanonan a bini hunto riba un otro Diadomingo na cas di Wina Tromp. Wina Tromp ta un abuela di 56 anja cu ta cuida su tata di 85 anja cu retonan grandi di salud. Wina ta manera un mama tambe pa dos di su nietonan, Jeanmiguel di 12 anja y Jeanuar Loepstok di 14 anja.
Cu un dedicacion imenso Wina ta maneha e peso di e responsabilidadnan aki. E tambe ta comparti con caro bida a bira. Su nieto Jeanmiguel ta conta cu un stem tristo con school a mande cas cu un carta cu si no paga airco-geld di 150 florin di e anja escolar 2021/2022 e ora no por drenta anja escolar nobo. E famia mester laga di paga otro cos pa Jeanmiguel por bai school e anja escolar nobo.
Cada ciudadano di Bushiri cu tuma palabra tin pesonan y retonan similar. Un di nan ta Zulma Brito. Zulma ta perdiendo su bista. Casi e no ta mira mas. Hunto cu e retonan financiero e quebrante di salud aki ta un carga hopi pisa. Hobennan Jeanmiguel y Jeanuar ta papia manera hendenan grandi di deseo pa cambio cu hoben candidato Wendrick Cicilia. “Nos ta corda con a pone cancha di yerba di futbol den bario di Bushiri”. Con weganan tabata worde organisa cu Bo Bario. Nan hunto cu e ciudadanonan presente a bin pa laga nan voz resona, pasobra nan tin confianza cu cos por cambia bek y bira mihor atrobe.
Riba un Diasabra mainta trempan tin un encuentro, e biaha aki cu ciudadanonan di Sabana Basora. Esaki ta tuma lugar na cas di Jeadrienne Rosel di 28 anja, mama di 3 jiu. Jeadrienne ta conta con dificil e ta pa pone pan riba mesa pa e muchanan. Aki tambe tur luna ta purba paga lo principal y algun cuenta ta keda atras. Jeandrienne ta un mama balente cu no kier laga e muchanan sinti ningun momento con dificil e situacion relamente ta.
Solo ta bahando na Mamoticastraat 26 na Tarabana.
Tur voz ta worde scucha den bario, pa bai resona den un Plataforma nobo di cambio pa Aruba basa riba e principionan di Bon Comun. Esey ta e meta di e encuentronan aki pa creacion di un alternativa berde.
