Parlamentario drs. Shailiny Tromp-Lee (MEP):
ORANJESTAD (AAN): Minister President a anuncia oficialmente cu diabierna awor Gobierno lo paga e 5% di salario bek. Na mi opinion esaki ta mas cu husto. Desde mei 2020 ambtenaar y semi ambtenaar ta aportando solidariamente na caha di gobierno mirando e impacto devastador di e pandemia.
Pa casi dos aña e placa di e recorte aki a keda destina pa duna asistencia financiero di emergencia na esnan cu a perde trabao of entrada door di e pandemia den sector priva.
E situacion den sector priva practicamente a normalisa caminda e trahadornan ya ta back na nan 100% di entrada. Awor ta toca tambe na nos ambtenaar y semi ambtenaar pa gradualmente cuminsa recupera nan entrada completamente back.
Un decision husto: Di con mi ta bisa esaki ta husto? Pasobra enberdad nos isla ta den recuperacion, pero na mes momento mundialmente tin diferente desaroyonan cu tin un impacto negativo riba economia di nos isla y riba nos bida. Mi ta referi na entre otro e guera entre Rusia y Ukraine, e efecto inflatorio di e prijs di crudo y flete y scarcedad di producto. Desaroyonan cu nos como un isla chikito no por influencia.
Mirando e situacion financiero di nos pais, practicamente ta imposibel pa Gobierno of nos companianan estatal absorba of sigui absorba e aumento di prijsnan aki. Cual ta pone cu nos ta experencia y lo sigui experencia cu costo di bida ta subi.
Na mes momento Hulanda ta sigui pone exigencianan cu a corto o largo plaso lo tin nan efecto riba nos cartera manera e exigencia di recorte den cuido medico. Tur esakinan hunto tin nan efecto riba e poder di compra di nos hendenan. Un situacion cu mas cu nos por mester keda suavisa y esaki por door di cuminsa duna e trahadornan nan salario back.
Aruba a cumpli cu e 3 condicionnan principal di Hulanda: Pesey mes, no obstante e hecho cu Hulanda y CAft ta contra, mi ta sostene Gobierno su decision pa cuminsa duna gradualmente back parti di e recorte na e trahadornan di sector publico entrante fin di e luna aki.
Aruba ta cumpli cu e 3 condicionnan principal cu inicialmente Hulanda a stipula. Na prome lugar Parlamento a aproba e fondonan necesario pa Gobierno por realisa e pago aki, dus e ta forma parti di nos presupuesto 2022 cu a keda aproba. Na di dos lugar e recorte di 25% di salario di Minister y Parlamentario si ta keda vigente y por ultimo Gobierno di Aruba a presenta e concepto di ley di LNT cual recientemente, cu algun cambio. Parlamento di Aruba a aproba.
Pa termina mi kier enfatisa cu contrario na tur speculacion negativo, nos Minister President, señora Evelyn Wever-Croes ta cumpli! Un persona cu a sa di goberna e pais aki den su peor momentonan. Cu a sa di gara cada reto cu dos man y a sigui padilanti. Nunca a baha cabes of a rindi. Semper ta sigui para pa su hendenan y su pais.
