Partido MEP ta yama bonbini na Rene Kock

ORANJESTAD (AAN):  Diaranson anochi 16 di october, na CEDE na Santa Cruz, Partido MEP a lansa dos candidato nobo riba e lista pa Eleccion 2024.

Un di nan ta señor Rene Kock, un hoben talentoso cu hopi pasion pa cultura di Aruba.

            Rene, desde hoben tawata inspira pa un dia por ta un representante di pueblo. Cuminsando for di tempo cu e tawata studiante na EPI, el a forma parti di varios plataforma politico hoben na scol y tambe como miembro di Parlamento Hubenil unda cu honor, el a sirbi como e prome Minister Hubenil di Cultura. Pa adkiri habilidad organisatorio y siña tocante liderazgo, el a sirbi como Presidente di HOT, e hala hubenil di partido MEP.

            Den transcurso di aña durante temporada di campaña tambe el a traha di cerca cu lidernan manera señor Nelson Oduber y e lider actual di MEP, Evelyn Wever Croes. Pa hopi tempo politica na un of otro manera a sa di forma parti di su bida y awor, e ta presenta su mes como e candidato pa promove cultura riba e lista prestigioso di MEP.

            Rene ta motiva pa sigui aporta na cultura di Aruba. Durante e ultimo 20 aña, el a dedica su bida na conserva, promove y eleva tur loke ta di Aruba. El a forma parti y ta sostene varios fundacion y comision di cultura y a sa di organisa varios evento cultural, creando un plataforma unda cu tur hende na Aruba, sin importa edad, genero, preferencia sexual, religion of ideologia politico, por siña mas tocante folklore y tradicion di Aruba. 

            “Cu hopi amor, pasenshi y dedicacion mi ta asumi e responsabilidad pa educa y planta e simiya di amor y aprecio pa cultura den nos hobennan. Mi compromiso como representante di cultura ta pa traha riba un modelo sostenibel y duradero unda mas fondo por wordo aloca pa cultura y asina mantene nos tradicion y folklore bibo. Lo mi sigui traha pa crea formanan pa brinda sosten y apoyo na proyectonan existente y nobo cu ta enfoca riba haci cultura atractivo pa nos muchanan y hobennan.

            MEP ta e movecion cu Aruba mester, MEP lo demostra un biaha mas cu e ta e partido cu ta traha pa pueblo, den tempo bon y menos bon. Bou liderazgo di Evelyn Wever-Croes, Aruba lo sigui avansa y prospera. Mi t’ey pa sirbi Aruba cu firmesa y autenticidad, cu amor pa cultura! Sin miedo, padilanti!”, Rene a expresa durante su lansamento como candidato nobo riba e lista victorioso di e prestigioso Partido MEP.

          Den nomber di Partido MEP, Lider di MEP, Evelyn Wever-Croes ta yama bonbini na señor Rene Kock den e gran famia di MEP.