Partido MEP sorprendi pa e forma con Den Haag ta atende islanan BES

Hulanda kier cambia dos Rijkswet aya sin nan permiso

ORANJESTAD (AAN): Partido MEP a participa den e reunion cu a ser teni Dialuna, unda delegacion di Eilandsraad di Bonaire y demas politiconan di Islanan BES tabata presente na Aruba, pa pidi sosten di politiconan pa cu nan lucha inespera cu nan ta confrontando awor.

   E lidernan politico di islanan BES (Bonaire, St. Eustatius y Saba) ta bishitando Parlamentonan di Aruba, Curaçao, y St. Maarten mirando e hecho cu pronto tin e Encuentro di IPKO na Hulanda y nan deseo ta pa haya sosten di Aruba pa asina presenta e cuestionnan aki tambe cerca Parlamentarionan na Hulanda.

   Uno di esnan cu tabata na e reunion cera aki, tabata lider di fraccion di MEP, esta Evelyn Wever-Croes.  E delegacionnan di Islanan BES a trece dilanti e situacionnan cu nan ta pasando aden cu Hulanda, unda Den Haag kier cambia 2 Rijkswet, esta WOLBES y FINBES, pero sin consulta cu e islanan BES, sin cu nan sa loke ta pasando, y awor Hulanda a dicidi na habri un ‘Internetconsultatie’, caminda Hulanda ta bay consulta cu henter e 18 miyon habitante di Nederland y e 37.000 hende di islanan BES, pero no ta papia ni cu Eilandsraad ni cu Bestuurscollege di e islanan.

   “Esaki ta algo honestamente cu mi a keda hopi impresiona, claro mi sa di cosnan cu ta pasando aya, pero asina-asina serio nunca mi a biba pensa cu e ta.  Con Hulanda ta maltrata nan.  Mi ta haya hopi duele, pasobra Den Haag ta trata ningun Provincia ni Municipio na Hulanda di e forma aki.”

   Ora di scucha con Den Haag no ta papia cu nan, Secretario di Estado ta bisa cu nan “no ta gesprekspartner”, ora nan yega cu Consehero, ata Hulanda ta bisa cu e Consehero no por drenta, pero Den Haag si ta sinta na mesa cu 20 consehero mes.

   Wever-Croes a indica cu e storianan aki a trece recuerdonan hopi malo y dificil cu Aruba a pasa aden durante negociacionnan cu Hulanda, y el a gradici e politiconan pa nan a bin, pa nan curashi, pa nan determinacion pa bringa y lucha, y sigui lucha.

   “Mi a duna nan nos palabra di lo tey pa nan, y nos lo sostene nan. Nos a presenta un carta, pa pone nos sosten riba papel. E ta un carta simpel cu na final ta duna e sosten moral cu nan tin mester pa continua.  Lamentablemente ta fraccion di MEP y PPA so a firma e carta.  Fraccionnan di AVP y Futuro a bisa cu nan ta sostene e causa, pues nan tambe ta condena y rechaza e forma con Den Haag ta atende Bonaire, St. Eustatius y Saba, pero no tabatin curashi pa pone nan firma abao.”

   Aruba tambe ta pasando den cosnan similar, unda bo ta haya Hulanda ta pone presion riba Gobierno y ta core tuma decision sin cu a consulta mes cu Parlamento riba e asuntonan aki.