Su mocion di desconfianza contra Glenbert Croes a fracasa
ORANJESTAD (AAN): Parlamento riba Diamars a trata un reunion publico yama pa partidonan MAS y AVP cu minister Glenbert Croes. Nan kier a haya mas informacion tocante e maneho di DIMAS.
Sinembargo Marisol Tromp y Mervin Wyat-Ras mas bien a probecha di e momento pa ataca y ofende e minister y demostra sentimentonan anti-stranhero, cual sigur ta di lamenta.
E minister a duna tur informacion tocante e maneho di integracion y a duna Parlamento tur documento corespondiente.
Un punto cu a resalta ta ora cu Marisol Tromp a cuestiona Minister Glenbert Croes riba capacidad di carga (carrying capacity). Riba esey minister Glenbert Croes a contesta Marisol Tromp: “Manera bo a parti tereno manera pamflet, no a resta tereno pa ningun hende casi traha cas!” Cuestionando asina cu Marisol Tromp ta esun cu a causa e problema y awor ta cuestiona otronan riba e problema cu e mes a cuestiona.
Mocion di desconfianza: Marisol Tromp y Mike Eman a declara cu nan no tin confianza mas den minister Glenbert Croes. Parlamento cu un mayoria di 12 voto sinembargo a confirma nan confianza den Minister Glenbert Croes y Marisol Tromp tabata visiblemente rabia y frustra cu su intento pa manda Minister Glenbert Croes cas!
E rabia di Marisol Lopez Tromp ta indicacion cu e maneho di integracion di e mandatario ta dunando su fruto pa tur stakeholder. Pues Minister Glenbert Croes t’ey pa keda pa hopi tempo ainda.
