Parlamentario Ricky Hoek (MEP):
*Relato financiero 2023 a keda entrega na Electorale Raad
ORANJESTAD (AAN): Na fin di luna di maart ultimo, partido Movimiento Electoral di Pueblo (MEP) a haci entrega oficial di su relato financiero di aña 2023 na Electorale Raad.
Parlamentario Ricky Hoek a laga sa cu desde aña 2020 e ley di financiamento di partidonan politico a keda aproba (banda di otro dos ley mas) pa Parlamento di Aruba y ta conta pa tur partido politico cu (t)a participa na un eleccion politico.
E ley aki den su esencia ta pa regula con un partido politico ta yega na su fondonan (tanto prome, durante y despues di un campaña). Dicho ley a haya su aprobacion debi cu esaki ta un ley hopi importante pa di un forma legal y transparente combati corupcion den e sistema gubernamental.
MEP ta cumpli cu deadline
Hoek a sigui bisa cu e deadline cu un partido politico tin pa entrega su relato financiero di e aña anterior ta 1 di april, manera e ley ta stipula.
Den cuadro di esaki MEP a cumpli cu e deadline stipula pa ley. Den un forma profesional y transparente MEP ta duna un bista di su finansas na e organo di Electorale Raad cu lo controla esaki.
Si pone atencion na e acto importante aki cu cada partido politico mester responsabilisa nan finansas, por a tuma nota cu ningun otro partido politico a vocifera di a cumpli cu e ley aki. Tampoco nos sa si nan a cumpli cu e deadline manera ta stipula den ley. Den todo caso, MEP a cumpli cu e ley di financiamento di partido politico 'al pie de la letra' y ta gradici tur candidato, directiva (principalmente e tesorera) y pueblo henter pa nan sosten y aporte durante aña 2023, Parlamentario Ricky Hoek a expresa.
