Partido MEP lo sigui traha pa engrandece deporte y un comunidad cu mente y curpa sano

Rodymar Geerman di Partido MEP

ORANJESTAD (AAN): Rodymar Geerman, candidato hoben di Partido MEP ta remarca cu ultimamente tin cierto aspirante politico cu e solo meta pa crea sensacion y gana voto den e proximo eleccion, ta duna informacion falso na e comunidad di Aruba. Rodymar ta conseha Wendrick Cicilia di AVP cu si e kier critica e maneho di deporte di Gabinete Wever-Croes I y II, lo ta miho pa e informa y educa su mes miho den e area di deporte, prome cu lansa mentiranan.

Durante gobernacion di Gabinete Wever-Croes II mester enfatisa cu a finalisa varios proyecto grandi pa cu deporte. Renobacion y/of inversion den luz, yerba y otro materialnan di deporte cu tin su costo cu ne pa por ta duradero y cu un bon acabada di e proyecto.  

Veld UNDESA

Por ehempel, prome cu haci speculacion y plama informacion falso den comunidad, bisando cu Gabinete Wever-Croes I y II no a drecha e veld di UNDESA, Wendrick Cicilia por a tuma e tempo pa busca miho informacion cerca esnan indica y lo a wordo informa cu e veld di UNDESA ta inactivo pa casi un decada.

Stadion Guillermo Prospero Trinidad

Pabou di brug e proyecto di mas grandi cu ta casi finalisa ta e renobacion di Stadion Guillermo Prospero Trinidad, un facilidad pa weganan local y international. Hasta weganan clasificatorio di CONCACAF por tuma luga awo na Aruba danki na e renobacion di e stadion y sin lubida e pista di track & field nobo.

BMX Jaburibari

E deporte di BMX tambe ta goza cu iluminacion nobo den e bario di Jaburibari unda awo hobennan por practica e deporte di BMX despues cu solo baha.

Proyectonan finalisa Pariba di Brug

Pariba di brug, e veld di Madushi a haya luz LED y verf, mescos cu e veld di Brazil cu tambe a haya luz. Basketball court na San Nicolas village a wordo full renoba pa e bario por disfruta di e cancha. Palo Margo a haya full un pista nobo cu lusnan LED y scoring-board pa e deporte di drag por a lanta bek riba pia.

Rodymar Geerman a india cu ”ta bon pa menciona tambe cu Gabinete Wever-Croes I y II durante e ultimo añanan a yuda hopi club y organisacionnan di deporte y/of atleta individual pa nan por representa Aruba y/of cu training den exterior. Tin hopi mas proyecto den pipeline y lo wordo realisa segun necesidad y e budget anual. “Awo T’e Ora!”, cu e sosten di e pueblo di Aruba dia 6 di december proximo, partido MEP lo sigui traha pa engrandece deporte na Aruba y asina stimula e movecion pa un comunidad cu mente y curpa sano.