Rycond Santos Do Nascimento contento y satisfecho:
ORANJESTAD (AAN) – Parlamentario Independiente, señor Rycond Santos Do Nascimento, lider di e Partido Lucha pa Reforma, ta hopi contento y satisfecho pasobra a logra di completa e cantidad di 586 firmanan rekeri pa e por participa den Eleccion Parlamentario, dia 6 di December venidero.
Den un entrevista cu DIARIO, el a expresa su gratitud pa tur persona cu a apoya “Lucha pa Reforma”, cu ta e partido nobo, cu el a lanta.
Santos Do Nascimento a bisa cu por ta no tur hende ta kere, pero tin cu a purba di sabotea Lucha pa Reforma, pero nan a logra. El a declara cu awo ta drenta un etapa nobo pa sigui lucha pa e cambionan cu e pais aki mester. El a bisa cu ta cambionan no solamente di corto plazo pero tambe di largo plazo, di locual el a papia pa hopi tempo caba, y tur hende conoce su vision.
“Y manera cu mi ta wak, nos mester combati corupcion y nos mester tin un maneho pa Salubridad Publico, un maneho pa Medio Ambiente, maneho pa nos grandinan, etc., y hopi di e puntonan aki ta conoci caba, pero den e siguiente simannan nos lo ta divulgando esaki, nos lo ta treciendo informacion, nos lo ta bay tin reunionnan, dus, esey ta e trabao cu nos tin nos dilanti”, e lider politico di Lucha pa Reforma, Rycond Santos Do Nascimento a declara.
