Parlamentario Marco Berlis, fraccion MEP:
ORANJESTAD (AAN)—Den conferencia di prensa di fraccion di Partido Movimento Electoral di Pueblo “MEP”, a elabora tocante dos tema cu e kier a comparti cu comunidad, cu ta relaciona cu e plan di gobierno pa baha costo di bida y hisa e poder di compra di nos ciudadanonan.
E prome ta pa informa pueblo cu despues cu nos pais a pasa den e pandemia, na 2023 finalmente, Aruba a recupera su finanzanan, su turismo y su economia. “For di e tempo ey gobierno ta duna bek na pueblo, pasobra tabata tin espacio financiero.
Y aworaki tambe, cu nos por a wak e presupuestonan 2023-2024-2025 a wordo entrega na tempo, y tambe ta mustra un surplus structural y sigur gobierno ta preparando pa bin cu siete punto di prioridad”, Parlamentario Berlis a señala y a menciona e prome punto di prioridad cu ta costo di bida.
Berlins a indica cu ora cu gobierno a haci un investigacion den pueblo, e prome punto di prioridad ta e preocupacion riba e costo di bida. Mirando cu costo di bida ta halto tur caminda rond mundo, y cu e pandemia a causa un scarcedad di hopi producto, prijs di transportacion y di petroleo a bay l’aira, tur esaki ta hunga un rol, y a impacta costo di bida, y nos Isla ta importa tur e productonan aki y inflacion tambe.
Un di e accionnan cu Gobierno lo bin cu ne pa acapara e costo di bida, ta door di: amplia e canasta basico ainda mas di loke e ta caba, tambe lo habri e posibilidad pa importa carni for di Colombia. Berlis a señala cu esaki ta algo cu nan ta bezig cu ne caba, y e proceso ta andando, y nan ta spera cu gobierno por concretiza esaki mas lihe posible, y tambe yuda comerciantenan baha nan gasto di importacion p’asina nan por baha nan costonan di producto.
“Sinembargo, mi tin cu bisa si, cu gobierno mirando e puntonan aki, ta dunando puntonan hopi fuerte pa por yuda baha e costo di bida, sinembargo ta keda, atrobe, na e empresario pa ora cu su gastonan baha e pasa esaki pa e producto, p’asina e por bira lo mas accesible pa pueblo. Naturalmente, for di akinan ta haci peticion aki, pa ora cu esaki tuma lugar, e comerciante por coopera y yuda pueblo, cu esaki tambe”, Parlamentario Berlis a señala.
Berlis a bisa cu e di dos tereno pa mehora e poder di compra di nos ciudadanonan, ta cu ta bay sigui aumenta e pensioen di behez.
“E pensioen a wordo aumenta, desde 2017, cuater biaha pa un total di 14 pa 17%. Y tambe, ya Minister Dangui Oduber a anuncia cu e lo bay aumenta pensioen un biaha mas. SVb lo sali bisa cuanto e porcentahe aki ta. Kiermen, lo sigui aumenta e pensioen aki structuralmente, pero tambe responsablemente. Tambe lo sigui aumenta sueldo minimo y onderstand pa esnan cu limitacion, y pa mamanan soltero, mientras e ta sigui yuda nan pa haya trabao”, Parlamentario Marco Berlis a señala.
El a agrega cu tambe lo baha loonbelasting. Esey ta un di e ideanan tambe, ya cu tin hopi mas espacio financiero, mirando cu tin surplus, p’asina mas placa por keda den e cartera di e trahadornan, lo baha tarifa di coriente, lo introduci subsidio di “energy toeslag”pa famianan den necesidad, pa nan no keda sin awa ni coriente.
