ORANJESTAD (AAN): Parlamentario di fraccion di MEP Endy Croes Diamars mainta tambe a papia riba e hecho cu a aproba den Parlamento entre otro compra di material pa cuerpo policial y pa Brandweer.
Croes a indica cu pa loke ta e bulletproof vests (chaleconan anti bala), a aproba pa cumpra 550 di esakinan.
“Mi ta sali bisa cu e fraccionnan di AVP, Accion 21 y MAS a vota contra esaki”.
Ora parlamentarionan nobo drenta, quizas bo tin cu duna nan un oportunidad pa custumbra cu e sistema.
Nos por a tuma nota di algun declaracion di Gerlien Croes y Rycond Santos do Nascimento y mi kier a coregi nan pa cosnan cu nan a trece dilanti cu no ta corecto.
Esaki segun Croes, kende a bisa cu Gerlien a trece dilanti den un conferencia di prensa cu e trabao di presupuesto mester a wordo haci hopi tempo caba, pasobra for di aña pasa e presupuesto a drenta Parlamento.
“Nos tur sa cu tabata un aña di pandemia y cu na Januari 2021 tabata tin hasta cartanan entre Gobierno y CAft relaciona cu e presupuesto cu no a drenta Parlamento na 2020”.
E expresion cu el a drenta aña pas 2020 den Parlamento no ta berdad, segun Croes.
El a mustra e documento riba cual tin poni cu stempel y tur, cu e documentonan menciona a drenta Parlamento den luna di Maart di 2021.
Pa loke ta do Nascimento, Croes a bisa cu e Parlamentario aki di AVP tambe a trece cosnan dilanti cu no ta cuadra cu berdad.
Croes a indica cu quizas door cu nan ta nobato ainda, nan ta comete e tipo di errornan aki.
El a bisa cu e ta spera cu despues di haya mas experiencia, nan lo trece mas tanto e berdad pa dilanti.
