ORANJESTAD (AAN): Durante conferencia di prensa di fraccion di MEP, e Parlamentario Xiomara Maduro,
a cuestiona di con Gobierno a laga Scouting Aruba completamente afo di celebracion di Dianan Nacional.
El a splica cu pesey el a manda preguntanan na Minister di Cultura, sr. Mike Eman. E parlamentario kier sa di con Scouting Aruba no a haya oportunidad pa participa den e celebracionnan nacional, manera Dia di Himno y Bandera, y Dia di Rey 2026. E ta haya cu Scouting Aruba merece respet.
Scouting Aruba pa hopi aña ta forma un parti esencial di e celebracionnan nacional y ta representa balornan importante manera disciplina, compromiso civico y amor pa pais. E exclusion reciente, segun Maduro, no solamente ta un falta di respet, sino tambe incomprendibel y inaceptabel, considerando e contribucion continuo di e movimiento scout na desaroyo di hoben y sociedad Arubiano.
Maduro a indica cu e situacion aki ta lanta preguntanan serio tocante transparencia, criterio di seleccion y respet institucional pa organizacionnan cu tin un rol importante den formacion di identidad nacional.
E parlamentario ta pidi contesta riba algun pregunta importante, manera: (*) Di con scouting no a wordo inclui. (*) Cual regla a wordo uza pa scoge ken por participa. (*) Si e decision lo wordo cambia. (*) Si lo tin miho coordinacion pa futuro.
Parlamentario Maduro ta enfatisa cu esaki no ta un asunto menor, sino un cuestion di coherencia den politica cultural y reconocemento di organizacionnan cu ta contribui activamente na bienestar di Aruba.
Finalmente, e parlamentario a indica cu e ta spera di haya contesta oficial di Minister Eman dentro di un periodo di 3 siman.
