ORANJESTAD (AAN): Strategia di AVP y tur su integrantenan ta mas cu obvio. Sinta warda tempo pasa pa pueblo lubida nan show
y falta di seriedad y respet pa pueblo durante e famoso reunion encuanto poder di compra y pobresa. Un reunion caminda mayoria no tabatin e desencia pa ta henter dia presente na pia di trabou. Sin lubida e echo cu nan a practicamente haci 0 pregunta y a brinda 0 solucion of sugerencia. Mas grave ainda, nan a silencia 1 di e 3 nan cu si mayoria di biaha ta na pia di trabou, esta Gerlien Croes.
Echo ta cu desde su ultimo rueda di prensa, ya 2 siman pasa, Gerlien Croes tambe ta den un silencio total. Pregunta ta si ta costa asina tempo pa tuma e decision pa para pa bo principio y pa para pa bienestar di bo pais y di Parlamento. Pa un persona cu semper ta cla pa cuestiona y critica y ta accentua cu e tin su pais y su pueblo na pecho, awe e ta demostra otro. Evaluando toch bienestar personal (carera politico) y di su partido.
Otro realidad ta cu AVP ta keda tira santo den wowo di pueblo. Subrayando e echo cu enberdad nan ta kere cu pueblo ta ignorante. E sentencia di hues den e caso Avestruz ta bisa cla y raspa, Sevinger a keda condena na corupcion y malversacion. Y asina mes nan ta keda sostene, ta keda acepta, tolera y hustifica e decision cu e ta keda como parlamentario. Un partido grandi demostrando un decadencia totaal. Ta ki ehempel y mensahe nan ta manda pa nos pueblo? Dos integrante a sali caba di partido y caya ta papia cu hopi di e hobennan ta evaluando pa haci mescos. Nos lo wak kico lo ta e desaroyo al respecto.
Pa finalisa mi ta comparti un biaha mas cu pueblo e realidad di AVP den parlamento. Nan tabatin 7 parlamentario den Parlamento, 4 nunca tey y practicamente no ta asisti na reunionnan, esta e oldboys network. Nan lider di Fraccion, Mike Eman, nunca a eherce e funcion aki y mas bien a laga pa Gerlien Croes haci su trabou pe. E mas tristo ta cu apesar di e berdadnan aki ainda nan tin e corahe di bati riba nan pecho y yamanan mes representante di pueblo. Unico cos cu nan ta haci ta cada pasa tempo un rueda di prensa y articulo den corant y nan programa radial. Nan echt no ta give a damn. Esey ta e tristo realidad di AVP.
