ORANJESTAD (AAN) – Parlamentario Marco Berlis, den conferencia di prensa di Fraccion di MEP, a referi na e evento organiza pa Partido MEP den Teresita Center na San Nicolas, yama “Ban Topa”.
Berlis a indica cu diferente minister y parlamentario tabata presente pa duna informacion na pueblo. El a subraya cu e encuentro aki tabata sumamente exitoso. E lugar tabata completamente yen, hasta tabata tin hende para full rond pa conecta cu e gobernantenan y asina ey ricibi diferente tipo di informacion.
Prome Minister Evelyn Wever-Croes a comparti informacion di interes cu e pueblo di San Nicolas y tabata presente tambe Minister Glenbert Croes y, entre otro, Parlamentario Alvin Molina.
Berlis a remarca cu tabata un anochi hopi interactive, y despues di e informacionnan duna tabata tin hopi pregunta skerpi y directo, y cu sin duda a wordo contesta cu contenido y sin miedo.
A reina un atmosfera hopi positivo y vibrante unda esnan cu tabata tey realmente tabata interesa pa conecta cu e mandatario, parlamentarionan y candidatonan. A bin dilanti palabranan di elogio, di preocupacion, etc., y tur esaki por a sinti refleha den e preguntanan di e publico.
Berlis a subraya cu en general, por a sinti cu tabata tin un satisfaccion cu e contestanan, pero tambe hamber pa tin mas tempo pa haci pregunta. Presidente di Fraccion di MEP, señor Ricky Hoek a anuncia cu lo tin otro sesion similar di Ban Topa, dia 6 di Juli venidero na Savaneta. Pero tambe a invita henter pueblo di Aruba pa asisti y participa cu nan preguntanan, preocupacion, inkietudnan cu nan ta sinti cu mester wordo lanza.
