ORANJESTAD (AAN) – Enseñansa ta un di e pilarnan mas importante pa desaroyo di cualkier pais, y pa e motibo ey inversion continuo den e sector ta esencial.
Parlamentario di Fraccion di AVP, Muzannin Wever, a enfatisa cu durante hopi aña no a haci suficiente inversion den enseñansa. Sin embargo, el a indica cu ultimamente e ta nota varios cambio positivo den e sector.
No obstante, Wever a señala cu enseñansa ainda ta enfrentando retonan significante. Segun e parlamentario, e carga di trabou cu docentenan ta cargando actualmente ta demasiado pisa. El a splica cu hopi maestro ta wordo obliga pa desempeña diferente funcion cu ta bay muchu mas aya di nan responsabilidad principal como educador.
“Hopi biaha maestronan ta eherce mas cu dies profesion den un. Ademas di duna les, nan ta wordo pidi pa actua como trahador social, consehero familiar, specialista di IT, psicologo, werkster y hopi otro funcion mas,” Wever a expresa.
Segun e, e situacion aki ta contribui na e presion creciente cu e sector ta enfrentando, y ta un di e motibonan principal pa cual algun docente ta scoge pa laga e profesion. E parlamentario ta di opinion cu e problema ta origina, den gran parti, den e falta di sosten profesional disponibel pa maestronan.
Wever a enfatisa cu inverti den enseñansa no ta limita solamente na material didactico, infrastructura of ekipo moderno. Segun e, inversion den maestronan y den personal di apoyo ta mes tanto importante.
“Aruba ta enfrenta varios reto social. Ta necesario pa scolnan conta cu suficiente trahadonan social y otro profesionalnan cu por yuda studiantenan supera problemanan personal y familiar, permitiendo nan concentra mihor den klas,” el a indica.
El a agrega cu no ta realista pa spera cu un maestro por atende e necesidadnan social y emocional di un alumno mientras cu tambe mester dedica atencion na e resto di e klas.
Finalmente, Wever a señala cu Minister di Enseñansa ta trahando riba iniciativa pa aumenta e cantidad di trahadonan social disponibel den scolnan, cu e meta di brinda mas sosten na docentenan.
“Nos ta spera cu esaki lo contribui na alivia e peso cu maestronan ta cargando actualmente, permitiendo nan concentra mas riba duna enseñansa di calidad y sigui eherce e profesion pa cual nan a prepara,” Wever a conclui.
