Parlamentario Dangui Oduber, fraccion di MEP:
ORANJESTAD (AAN)-- Parlamentario Dangui Oduber di Fraccion di MEP, a duna di conoce, den conferencia di prensa, Diamars 16, cu MEP a organiza un sesion cu e gremionan comercial y sindical, p’asina haci un presentacion riba e temanan di Rijkswet HOFA, mirando cu Raad van Advies como experto local, ta cu a conclui cu HOFA ta kita Aruba su economia y ta contra nos Constitucion, y a wordo sugeri pa saca articulo 38 di e Ley di HOFA, mientras tanto e conseho di Raad van Staten tambe ta cla riba e Rijkswet aki.
E ta yega na e mesun conclusion di Raad van Advies, cu e ley aki ta mina nos autonomia, loke Fraccion di MEP a bin ta bisando for di aña pasa.
“P’esey nos a haya importante pa invita e gremionan comercial y sindical, p’asina duna nan splicacion riba e conseho y kico ta nos posicion, y naturalmente, kico nos ta propone como fraccion di MEP. Y, p’esey nos a bisa cu e ley aki HOFA, bao ningun circunstancia e por bira un realidad pasobra gobierno solamente ta papia riba beneficionan financiero cu Aruba ta bay haya, si e bay di acuerdo, cu e interes ta baha pa nos prestamonan ta baha di 6.9% pa 3.4%, pero ni Minister Geoffrey Wever ni Prome Minister Eman, ni Minister Gerlien Croes, ta papia di e consecuencianan y e prijs cu nos tin cu bay paga”, Parlamentario Oduber a señala.
Oduber a acentua: “E prijs ta cu nos mester bay entrega nos libertad, nos autonomia, pasobra esun cu tin e palabra final riba e presupuesto di nos pais ta Conseho di Minister di Hulanda, cu ta consisti di politiconan Hulandes cu nos no ta conoce”.
El a agrega cu esun cu tin e ultimo palabra riba cambionan den Aruba su presupuesto ta Rijksministerraad, politiconan Hulandes cu ta sinta na Den Haag, cu no conoce nos historia, y hopi di nan no tin e sentimento di nos, pa sinti pa nos autonomia. P’esey nos a splica tanto e gremio comercial como e gremio sindical, cu na e momentonan aki, na Aruba no tin consenso.
Nos ta mira claramente cu ya caba tin 10 miembro di Parlamento ta contra e ley di HOFA, tur sindicato ta contra HOFA, y nos ta sinti tambe cu den e gremionan comercial tin hopi duda riba e consecuencianan. Naturalmente, tin beneficionan financiero pero e prijs cu bo ta bay paga pa acepta e ley HOFA ta mucho caro, mucho halto, pasobra e prijs cu bo ta bay paga como pais ta cu ta perde bo libertad y autonomia pa tuma bo propio decision”, Parlamentario Dangui Oduber a remarca.
