ORANJESTAD (AAN) – Durante e sesion di presupuesto supletorio 2025 den Parlamento di Aruba, lider di fraccion di AVP, Jennifer Arends-Reyes,
a sali na defensa di tur docente di nos isla despues cu hopi intento a ser hasi pa mehora e salario. Den nomber di su fraccion, Arends-Reyes a presenta un mocion cu ta pidi un restructuracion di e sistema salarial pa docente den e sector publico.
E mocion ta basa riba un realidad preocupante: e sistema salarial actual pa docente na Aruba no ta competitivo mas y tin mester di un revision profundo. “Docente ta e yabi central pa un sistema di enseñanza fuerte y sostenibel” Sra. Arends-Reyes a enfatisa.
E motibo principal pa e mocion ta:
• Salario actual di docente ta hopi abou compara cu otro profesion, cu ta crea un desbalans den mercado laboral.
• Hopi docente ta bira desanima of ta sali pa traha na otro pais caminda salario ta mas halto, of ta scoge pa cambia di profesion.
• Falta di docente motiva y cualifica ta baha e calidad di enseñanza na Aruba, algo cu AVP ta considera inaceptabel.
• Ta urgente pa tin un revision integral di e structura di salario y trayectoria di carera, cu diferenciacion segun responsabilidad, escasez di vak of prestacion di docentenan.
Arends-Reyes a insisti cu gobierno mester actua riba termino corto pa hiba e cambio structural necesario. “E situacion actual ta pone presion enorme riba nos scolnan. E resultado ta un deterioro di calidad di enseñanza, algo cu ta un sla directo riba nos futuro generacion” Sra Arends-Reyes ta termina bisando.
