40 Aña di Status Aparte:
ORANJESTAD(AAN): Cuarenta aña despues di e logro historico di Status Aparte, Aruba atrobe ta enfrenta un decision crucial cu lo defini e futuro di e pais. Segun Parlamentario Hendrik Tevreden, e debate riba e posibel introduccion di HOFA no ta un simpel discusion financiero, ni un simpel debate tocante interes y debe publico. Mas bien, e ta un decision fundamental cu lo determina con e pais aki lo wordo goberna pa e siguiente generacionnan.
-E costo real di interes mas abou
E parlamentario ta enfatisa cu, maske Gobierno ta pone hopi enfasis riba e posibel rebaho di interes cu HOFA por trece cune, e costo real di e decision aki ta bay hopi mas leu cu simpel cifranan den florin. P’esey e ta cuestiona: Kico por ta e costo real di e rebaho ey?
Tevreden ta subraya cu esaki ta un pregunta cu no por keda den man di expertonan financiero ni economistanan so. Pasobra e impacto ta uno integral cu ta afecta nos autonomia, e aspecto social, cultural, constitucional y den e capacidad di Aruba pa determina su propio futuro. P’esey, no tin ningun motibo pa Aruba tuma un decision di e magnitud aki sin prome analisa e experiencia di otro paisnan den Reino:
Sint Maarten: Despues di Horcan Irma, e reconstruccion tabata un necesidad urgente. Sin embargo, e maneho di fondonan bou condicionnan estricto y supervision externo a genera retraso structural, frustracion y e sensacion cu e pais no por a actua cu e rapidez cu e crisis tabata exigi.
Corsou: Diferente forma di supervision financiero a provoca conflicto continuo entre Willemstad y Den Haag, caminda decisionnan economico y presupuestario a bira tema di negociacion politico, limitando e espacio di e pais pa goberna su mes.
"Supervision structural semper tin consecuencianan politico, administrativo y social. Aruba mester studia e ehempelnan aki bon prome cu tuma un decision," Tevreden a bisa.
-Control interno en bes di HOFA
E parlamentario ta expresa su preocupacion pa e echo cu, mientras Gobierno ta argumenta cu HOFA lo fortalece nos finansas publico, e mesun Gobierno ey ta sigui haci gastonan ad hoc sin un modelo structural debidamente incorpora den presupuesto.
Documentonan reciente, manera e rapport 'Bo Aruba' di Algemene Rekenkamer Aruba (ARA), ta confirma cu nos pais ta enfrenta retonan serio den gobernacion, planificacion y sostenibilidad financiero. Sin embargo, Tevreden ta enfatisa cu e solucion pa e debilidadnan aki no ta pa entrega autoridad na exterior, sino pa fortalece nos mesun mecanismonan di control interno.
Segun e parlamentario, un democracia mas madura no ta depende di mas supervision di afo, sino di:
Un control parlamentario mas fuerte y efectivo.
Mas transparencia den e proceso di decision.
Un prensa critico y independiente.
Un comunidad cu ta participa activamente den decisionnan nacional.
-Libertad no tin prijs
Parlamentario Hendrik Tevreden ta resalta cu Status Aparte tabata un expresion di confiansa den e capacidad di e pueblo Arubano pa goberna su propio destino. Awor, 40 aña despues, e momento a yega atrobe caminda e futuro di e pais ta den wega.
Tevreden ta indica cu den Parlamento dies voto ta conoci caba, y cu un solo voto por determina e rumbo di Aruba pa decadanan cu ta bin. Cu esaki den mente, e parlamentario ta haci un yamada directo na e consciencia di e colega cu tin e voto decisivo ey, sperando cu e no lo mira solamente e ganashi di awe cu ta wordo priminti riba papel, sino e legado cu bo no por cuantifica y cu e siguiente generacion lo mester paga.
"Interes por baha, pero autonomia, unabes cu bo perde un parti di dje, no ta facil pa recupera. Libertad no tin prijs!" Parlamentario Tevreden a conclui.
