Parlamentario Evelyn Wever-Croes a presenta
- Tur esaki tocante conseho di Raad van State riba HOFA
- Tin consensus boluntario y real of no
ORANJESTAD (AAN): Parlamentario Evelyn Wever-Croes a elabora riba e analisis cu profesornan Hulandes Elzinga y Broeksteeg a publica recientemente tocante e conseho di Raad van State riba HOFA. Segun Wever-Croes, e profesornan ta critico cu Raad van State no a bay suficientemente profundo den e evaluacion constitucional di e Ley di Reino HOFA. Di e ocho puntonan cu e profesornan a identifica, Wever-Croes a enfoca riba tres argumento principal.
Prome, si HOFA ta realmente temporal. Aunke e ley ta wordo presenta como un medida temporal, e profesornan ta bisa cu no tin ningun garantia huridico cu esaki ta temporal. Y si e no ta temporal, e ta permanente. Aruba no por sali unilateralmente for di e Ley di Reino; e decision final ta den man di e Conseho di Ministro di Reino na Hulanda. Esaki kiermen cu, aunke Aruba ta cumpli cu tur condicion durante añanan, Hulanda tin e ultimo palabra si Aruba por sali of no. Segun e profesornan, si no tin garantia di ta temporal, e impacto riba autonomia di Aruba por bira permanente.
Di dos, e profesornan ta critica articulo 38 di HOFA. E articulo aki ta establece cu leynan local mester aprobacion Hulanda prome cu Parlamento di Aruba por aprob'e. Esaki ta duna Conseho di Ministro di Reino un poder cu no ta hancra niun caminda den niun ley. Segun nan, esaki ta contra Constitucion di Aruba, Constitucion Hulandes y Statuto di Reino. Nan ta argumenta cu Conseho di Ministro di Reino no tin e autoridad constitucional pa eherce e tipo di control directo aki. Segun e profesornan, articulo 38 ta duna Conseho di Ministro di Reino un poder cu no ta basa riba ningun fundamento constitucional.
Argumento constitucional: “Esaki no ta un argumento politico pero un argumento constitucional y ta pesey e ta asina importante”, Parlamentario Wever-Croes a duna di conoce.
Di tres, e profesornan cuestiona si realmente por papia di un consensus boluntario y real. Segun nan, un consensusrijkswet mester ta basa riba igualdad entre e partenan durante henter e proceso. Pero si Hulanda ta bisa cu e ta baha interes pa Aruba, pero Aruba tin cu entrega su autonomia na Hulanda den e rijkswet, ta un indicacion cu Aruba no ta bezig ta negociando for di un punto di bista igual. (Gelijkwaardig) si no bou di presion financiero. Solamente si no tin e presion financiero, anto e ora ey por bisa cu tin algo boluntario, un consensus.
“Ademas, e bestuurlijk akoord cu Gabinete Wever-Croes a firma na aña 2024, no ta bindend, e no ta mara ni e gobierno actual ni e Parlamento di Aruba”, Parlamentario Wever-Croes a enfatisa.
Wever-Croes a conclui cu esakinan ta tres di e 8 arugumentonan principal di e analisis di e profesornan riba HOFA: no tin garantia cu e ta temporal, articulo 38 ta contra nos constitucion y contra autoridadnan cu Consheo di Minister di Reino por haya y e no tin consensus. Segun e, esakinan ta argumentonan cu merece un discusion profundo prome cu tuma un decision definitivo.
