Pa eherce control mas frecuente na casnan priva di cuido pa grandinan
ORANJESTAD (AAN) Parlamentario di Fraccion di FUTURO, Gino Goeloe, a sigui splica cu di tur e casnan priva pa cuido di nos grandinan, IVA a traha un rapport cu ta mustra cu no tur e casnan aki ta cumpli cu cierto exigencianan estableci den e Ley cu a pasa na aña 2012, bao minister Schwengle e tempo ey.
“Di e rapport ey nos tur sa cu no tur e casnan aki, ta cumpli cu cierto exigencianan y den e caso aki e tema number uno ta un enfermera profesional y no tur e casnan aki tin un enfermera profesional trahando pa nos grandinan, den e caso aki cu sa di remedi, cu sa si tin catheter, cu sa si e pashent haya un stroke of atake di curazon kico e tin cu haci. Bo mester ta profesional y entrena pa trata cu hendenan asin’aki.
“Den e caso aki mi a acerca e director di IVA y mi a bis’e cu nos mester bishita e casnan aki mas frecuentemente, tur luna y den e caso aki sin aviso. E director a bisa mi cu e kier haci’e sigur y cu e ta haciendo esaki caba, pero por hacie frecuentemente pasobra e tin falta di personal. El a menciona cu e falta dos persona cu HBO nivel pa haci e control aki, pues inspectornan cu por haci bishita y mi a bise cu mi ta bay papia cu e minister concerni señora Wyatt-Ras, pa nos duna IVA e dos personanan aki tambe, p’asina aki nos por garantiza e controlnan no ora tin keho so, pero regularmente”, Parlamentario Gino Goeloe a señala.
