ORANJESTAD (AAN)—Parlamentario di fraccion di MEP, Evelyn Wever-Croes, a tuma nota cu Minister Arthur Dowers tur dia ta sali ataca su persona y su famia,
na lugar di soluciona e problema cu el a hinca su mes aden. Asina, Wever-Croes ta declara:
“Ami kier bisa señor Dowers: ami no a nombra famia, mi a nombra profesionalnan; tur a pasa screening y mi a bay segun procedure. Si minister Dowers a haci mescos, si el a nombra profesional cu a pasa screening y el a pasa procedure, awe WEB cu ELMAR no ta coriendo riesgo di mester bay paga 5 miyon florin extra na interes, como un sorto di ‘boet rental’. Mi ta keda para ariba, cu esaki ta un decision pober, un decision ekivoca di Minister Arthur Dowers, y e mester para responsable pa e cinco miyon ey; no ta husto pa pueblo mester pag’e”, Parlamentario Evelyn Wever-Croes a señala.
“Mi ta weita cu den su atake, den su defensa, e ta hinca famia den e cos akinan, placa cu no a bay den famia, y tur eseynan ta mentira. Y mi ta kere cu loke Minister Dowers mester haci ta stop di bay na e politica ey, y di e nivel eynan, pero djis goberna! E solucion pa e problema cu Minister Dowers a hinca su mes aden ta, cana segun procedure. Si kier cambia miembronan di e board bo por cambi’e. Bo mester tin motibo y bo tin cu sigui procedure”, Wever-Croes a reitera.
El a agrega cu e procedure ta cu señor Dowers tin cu papia cu e banconan prome. “Nos a hacie na momento cu nos tabata den gobierno, nos no a haya nunca e problema aki. El a bin hacie na un forma iresponsable. El aworaki ta den e problema akinan, e riesgo ta pa WEB y ELMAR cu e gasto adicional aki, y no ta husto pa pueblo mester bay paga e cinco miyon aki.
“Desde akinan, un biaha mas, e apelacion pa Minister Dowers y henter Gobierno, djis tuma responsabilidad pa boso actonan. Awor ta parce manera cos ta ‘Evelyn ta e problema’. Evelyn no ta e problema! Ami no a nombra hendenan di reputacion dudoso, ami no a bay contra procedure, y ami no a pensa mes riba hende cu lo no pasa screening. Al contrario, nos a nombra profesionalnan cu a pasa screening y nos a bay segun procedure”, Parlamentario Evelyn Wever-Croes a enfatiza.
