ORANJESTAD (AAN): Parlamentario pa Fraccion di PPA, Otmar Oduber,
a presenta un serie di pregunta serio y directo na Minister di Finanza y Economia, Geoffrey Wever, tocante e situacion preocupante di FreeZone Aruba N.V. (FZA) y retiro di su ex-director Greg Peterson.
E informacion cu a bin dilanti tocante e añanan largo di mal maneho, falta di pago di e primanan di pensioen y ausencia di resultado economico ta algo sumamente grave. “Nos no por sigui mira miyones di placa di pueblo ta wordo mal gasta den un entidad cu no ta entrega nada di resultado. E pueblo tin derecho na transparencia y accion inmediato,” segun Oduber.
Pregunta riba maneho y falta di accion
Fraccion di PPA a pidi Minister Wever pa bin splica den un ‘vragenuur’ dicon FZA a pasa hopi aña cu mal maneho, sin cu gobierno a tuma accion mas prome. Tambe dicon e retiro di Greg Peterson a tuma lugar te awor, despues di mas di 20 aña na funcion, mientras tabatin un rapport di PWC for di 2022. PPA ta cuestiona tambe dicon e recomendacionnan di e ‘doorlichtingsrapport’ di PWC di augustus 2022, cu a indica cu FZA ta stagna den traha inversion, innovacion y diversificacion, pero minister no a haci niun cambio significante. “Kico e ministerio a haci desde cu a publica e rapport? Dicon no tabatin medida pa evita e situacion?” ta algun di e preguntanan cu Oduber a haci.
Rol di ministerio y Raad di Commissarissen
Un otro cuestion condenabel ta e rol y responsabilidad di Raad di Commissarissen y ministerio. Segun e rapport, e instrumentonan di accionista no tabatin uzo den FZA. “Nos kier sa con ministerio a monitoria e rol y kico ta e rol cu Raad di Commissarissen a hunga den casi tres decada di mal maneho,” Oduber a agrega.
Fraccion di PPA ta cuestiona tambe e falta di pago di e primanan di pensioen na ENNIA di personal di FZA. “E pueblo y e empleadonan merece pa sa kico a pasa cu e placa aki y kico ta e responsabilidad di minister den henter e asunto aki,” Otmar a indica.
Pregunta financiero y futuro di FZA
PPA kier transparencia riba e situacion financiero actual di FZA y tambe unda e fondo a keda. “Cuanto placa di comunidad a wordo gasta desde 2021 na FZA y cuanto resultado real a logra? Unda e miyones di florin a keda?,” Oduber a enfatisa.
Fraccion di PPA ta pidi pa e minister en cuestion bin duna claridad riba su vision pa e rol di un zona liber den economia di Aruba pa 2025. “Nos mester sa si e minister tin plan pa restructur’e, reform’e of hasta sera e entidad. Nos no por sigui perde placa di pueblo sin pone niun hende responsabel,” segun Oduber.
Finalmente, Fraccion di PPA ta exigi pa Minister Wever ta cla pa un investigacion independiente riba maneho financiero y politico di FZA, incluyendo su propio periodo di funcion y comparti e resultadonan publicamente. “E silencio y falta di accion no por sigui. Pueblo tin derecho na claridad y transparencia y responsabilidad politico di e minister den e asunto aki,” Otmar Oduber a conclui.
