Parlamentario Evelyn Wever-Croes a splica dicon e ley di Reino HOFA no mester bin

Den reunion cu vice presidente di Raad van State

ORANJESTAD (AAN):  Señor Thom de Graaf, vice presidente y un delegacion di Raad van State tabata di bishita e siman aki na Aruba, y a reuni cu lidernan di fraccion den Parlamento. Raad van State tabata e instituto Hulandes cu ta duna conseho riba leynan di reino, manera e HOFA. “Pesey mi a probecha di e oportunidad pa splica dicon e ley di HOFA no mester bin. 

Primeramente pasobra e version di e ley cu e gobierno di AVP-Futuro a aproba, NO ta di acuerdo cu e acuerdo cu nos gobierno a sera cu Hulanda na 2024. Pa di dos, e version di AVP-Futuro ta CONTRA nos Constitucion y ta perhudica Aruba. Y pa di tres, e no ta necesario, pasobra Aruba riba propio forsa mes ta logrando di yega na un quota di debt-to-GDP di 50%, ya caba na 2029. 

E HOFA ta malo, y e no ta necesario. Pakico sigui cun’e?. Mi compromiso ta pa splica tur instancia dicon e ley aki ta malo, y dicon gobierno mester frena e proceso te ora tin un gobierno nobo na Hulanda, pa por renegocia e supervision financiero, pero na drechi. 

Ta hopi importante pa Raad van State conoce e argumentonan di trempan, prome cu nan haña e ley  pa duna conseho riba dje. Te ainda e proceso ta frena na Hulanda, despues di internetconsultatie nada mas a sosode. Mi ta contento di mira cu a frena e proceso, pero nos lo no descansa te ora bahe completamente for di mesa”, Evelyn Wever-Croes a duna di conoce.