Parlamentario Endy Croes ta haya cu awor si Politica barata mester ta pa pasado

ORANJESTAD (AAN): Parlamentario Endy Croes ta lamenta masha hopi con 2 locutor kendenan a atraca caha di gobierno pa un suma di 8 miyon Florin bao di gabinete Eman I y gabinete Eman II, awe ta grita y haci tur sorto di boroto pa trece instabilidad politico den un isla cu asina tanto reto.

   Aruba ta traspasando den su momentonan mas critico den su historia. Promer Minister a atende cu e Pandemia aki na un manera diligente y ta riba e caminda corecto drentando e fase di recuperacion. Hendenan manera Patrick Paskel y Speed Andrade cu a  cobra of a “horta” e pais aki  na un manera kisas “legal” sin escrupulo un suma di 8 miyon Florin na propaganda.  Net nan kier lanta tur dia cu un storia alrespecto pais Aruba.

   Croes a manda algun cobranza pa recorda pueblo riba esey.

   El a inclui algun cobransa di Patrick Paskel di Tera Group unda ta ilustra con Patrick cu bendicion di Mike Eman tabata ranca miyones di e pueblo aki pa nan propio cartera. Asina tin hende cu a inventa “media monitoring” pa monitoria y graba tur radio y medianan kico nan ta papia di gobierno di AVP e tempo aya. Pa esaki nan tabata cobra miyones.

   No mester lubida cu e mesun tiponan aki a hinca nan man den Utilities Aruba NV pa 500 mil, HORTA den Refineria di Aruba (RdA) otro 500 mil sin contract, strica den Lotto y AVB mas di 500 mil. Pues habraca nan a habraca cahanan di pueblo.

   Awor e cabuya di “horca” ta pretando nan garganta y cranchi a sera  nan a cuminsa dal saltonan mortal cu tur sorto di critica. hasta lembe nan ta lembe na manera fini awor pa cu e proximo gobernacion.

   Te hasta riba Ministerio Publico nan ta  calumnia. Ta bon pa hustamente Ministerio Publico tira un bista mas di acerca riba cobranzanan di companianan Tera Group, Paxi (ambos di Patrick Paskel), Paparazzi di Speed y diferente otro companianan di e “tiponan” aki. Na un manera di sinberguensa nan a aranca masha hopi placa di pueblo.

   Ta pa e rasonan di a cobra sumanan extravagante na e manera di abusador e dosnan aki ta defende Mike Eman y AVP a costo di tur cos. Por ehempel werksternan ta pasando den angustia y e placa cu Patrick cu Speed a ranca for di caha di pueblo por a garantisanan 8 aña di salaris y trankilidad.

   Asina por sigui riba e dos locutornan cu ta kere cu Aruba ta di nan so y ningun ni husticia lo por persigui nan. Den e temponan actual cu Aruba ta traspasando hendenan negativo asina manera Patrick y Speed  mester keda leu di tur gobernacion  y sigur leu di e caha di pueblo pa Aruba por recupera Croes ta termina bisando.