ORANJESTAD (AAN): Dialuna mainta, durante un rueda di prensa na Instituto Medico San Nicolas (ImSan), Minister Dangui Oduber a haci algun anuncio importante pa loke ta cuido medico y servicio na
Aruba.
El a cuminsa na bisa cu ora cu a drenta gobierno na 2017, e enfoke tabata dirigi pa mehora e calidad di cuido y servicio, haci inversionnan continuo den cuido medico, percura pa reduci e lista di spera, mantene e gastonan medico pagabel y tambe pa garantisa cu e fondo di AZV ta keda sostenibel.
E mandatario a sigui bisa cu un punto principal den e maneho di gobierno ta prevencion den salud y asina a lansa e Plan Nacional di Prevencion como e prome pais den Caribe cu tin un plan asina. A desaroya esaki conhuntamente cu Pan American Health Organization y tambe cu tur stakeholder den cuido medico na Aruba.
Segun Oduber, pandemia a pone hopi proyecto den 'standby', pero na e momentonan aki ta cla pa ehecuta e Plan Nacional di Prevencion aki.
Fin di luna ta bay lansa oficialmente e 'Aruba Healthy Lifestyle Center' cu ta pa yuda tur esnan cu tin problema cu salud, cu peso, pa asina por haci intervencion pa garantisa nan un miho calidad di bida y percura pa maneha e gastonan den cuido medico, Dangui Oduber a duna di conoce.
E retonan den salud publico ta grandi. Aruba ta un comunidad cu ra sufri di vergrizing. Un grupo grandi den comunidad no ta esnan di mas saludabel. Hopi ta sufri di malesanan cronico.
Mundialmente ta nota cu e gastonan di cuido medico ta subiendo y na Aruba tambe. Tambe ta nota cu tin un scarcedad grandi di e personal medico, a agrega.
No obstante a traha di cerca cu AZV, a bisa, ImSan, Hospital, e prome y e di dos linea di cuido pa asina percura pa e maneho aki wordo ehecuta na bienestar di tur e aseguradonan di AZV.
Minister Oduber a sigui bisa cu no obstante e retonan a haya espacio pa na 2023 haci varios inversion den cuido medico pa asina mehora e cuido y servicio.
Asina el a anuncia cu pa medio di AZV ta bay financia e compra di dos ambulance nobo, cu ta conta cu e tecnologianan di mas moderno, 'state-of-the-art'. Na 2018 a haci compra di e ultimo ambulance y aworaki a tuma e decision pa cumpra dos ambulance mesun cos.
Segun planificacion, nan lo yega Aruba den e di tres kwartaal di aña. E intencion ta pa reemplasa dos ambulance cu no ta den e mesun condicion pa asina tin tres ambulance di e mesun forma aki, a splica.
No obstante e retonan financiero, a haya financiamento pa e dos ambulancenan aki cu ta nifica un inversion cuantioso pa asina percura cu Aruba ta conta cu tres ambulance 'state-of-the-art', e mandatario a expresa.
