ORANJESTAD (AAN): E miembro di Partido UPP, esta drs. Booshi Wever a expresa cu den su opinion, e ceramento di Dump ta un otro sprookje y kizas hendenan no a puntra ta “kende ta bay paga pa esaki”.
El a bisa cu dia 31 di december 2022 cu un tremendo show a pone heki pa mustra comosifuera cu e dump na Parkietenbos a cera por completo. Pero segun drs. Wever, nos tur sa cu esaki NO ta cuadra cu e realidad. Di con? Pasobra ainda e porkeria di e incenirator chikito ta sporadicamente den operacion, e "medical waste" y e cadavernan keto bay ta bay riba e dump na
Parkietenbos.
A cambia unda mester tira e desperdicio, siendo den e ley di Serlimar 2005 ta bisa cu esaki mester sosode por medio di un Decreto Ministerial (MB). Pero e MB porcierto no a wordo publica ainda.
Loke ta hopi peculiar ta e hecho cu ta cera e dump na Parkietenbos pero ta laga e dump na Sero Tijsji habri, cu ta ni 500 meter pariba esun existente. Pero ta keda boca cera riba e hecho cu e dump di Sero Tijsji aki ta produci un holor insoportabel y ta sumamente toxico. Di con tur hende ta keda keto riba esaki? Acaso e holor aki no ta malo a salud pa e habitantenan? Of cu esey no ta "give a damn" mas?
Loke si ta un hecho ta cu e tarifanan a subi sin misericordia. Djis pa ilustra un paar di ehempel, Wever a duna e prijs cu ta worde cobra. Y ainda no ta tur prijs a worde calcula exacto.
Realidad aworaki mes: El a menciona cu prijs di Green Waste a subi di Afl 18 per ton pa afl 128.40 per ton (si esaki ta mas cu 1x pa siman y prijs pa loke rosa tereno). Un aumento di mas di 700%.
Prijs di Mixed y Bulk Waste di Afl 60 ton pa afl 192.60. Un aumento di mas di 310%.
Ya caba nos ta mira cu prijs di baki di sushi a conoce un aumento drastico. Tabata cobra 250 Florin antes, pero awor ta cobra 655 Florin pa un baki di 20 ton.
Cu otro palabra di e 655 Florin ta 1/4 so ta pa e compania di baki, e resto ta pa e compania di procesa y bbo. E companianan di baki y dumptruck a practicamente bira trahado di e compania cu ta tuma e sushi cu al final lo mester cera su portanan!!
Si nos tuma nota di loke mester ser paga pa e ton (128 Florin), rosamento di tereno pa traha cas lo bay conoce un aumento considerabel. Pues a cera e dump sin importa kico esaki kiermeen pa e cartera di pueblo cu ta esun al final lo mester bay paga pe.
Den e lista ta para cu "bouwafval" ta gratis. Ken ta haya e "afval" aki? Kico ta ser haci cu esaki? Cuanto Florin e pueblo ta haya di esaki? Ta recycle esaki pa traha algo cune? Cu otro palabra "trash2cash" ta algun previlegiado lo benificia di esaki atrobe.
Ta haci comosifuera cu den "trash2cash" e sushi lo genera entrada. Pero e sushi no ta genera entrada pa esun cu entrege. E ta genera entrada pa esun cu tume paso pueblo mester paga ora entrega e sushi.
Aki a minister ta usa palabranan bunita y grandi manera "circular economy" sin duna un bon splicacion. Pasobra loke ta bay sosode ta cu di e desperdicio tin algun cos ta worde saca y rebende sin cu pueblo ta mira algo di dje (p.e. bouwafval) pero e gran mayoria ta worde poni den bales y ta simpelmente worde dera (sin liners) cu ta produci un holor insoportabel y toxico. Esaki ta un economia circular cu e pueblo mes no ta benificia di dje?
Y minister su reaccion ta uno caotico unda hasta awor ta menciona den su entrevistanan cu ta mira kico por bay haci y pesey lo bay papia cu e compania di Waste Away (lesa Bouldin & Lawson) wak kico nan por nifica.
Den su opinion, Wever ta haya tur esaki pues como un sprookje atrobe cu ceramento di Dump ta e solucion! Di con semper ora ta trata e compania poderoso aki tur hende ta keda keto? Un "sprookje" cu te hasta ta pone full Parlamento, sindicatonan, gremio comercial y mas keda keto.
