ORANJESTAD (AAN) – Siguiendo cu e conferencia di prensa extenso di e lider di Plataforma Nos Pais, señor Otmar Oduber,
ademas di puntra kico a bay bon cu e cartera di Minister Ursell Arends, su otro pregunta ta, kico a pasa cu e economia di Pais Aruba, durante e tres añanan ey. El a sugeri prensa y pueblo di Aruba contesta esaki. El a pidi pa pensa y dune un logro, no dos, pero uno riba tereno di economia cu a yuda Aruba durante e ultimo tres añanan y mey.
Oduber a remarca cu ta su persona a percura y a zorg pa e cambionan den ley cu a tuma lugar na 2011, cu dia di awe turismo ta na top den cara di mundo den Caribe sigur, cu Aruba por a sali for di un pandemia danki na un ATA Suigeneris cu a wordo considera un banco pa hopi politico. “Danki na e banco ey, e strategia di 2011 di a haci ATA Suigeneris, awe nos ta para riba nos pia pa loke ta turismo”, Oduber a remarca.
El a subraya cu awo ta papia di politiconan nobo, pero e pais aki mester di politiconan cu experiencia. “E pais aki mester di politiconan cu sa con pa tuma decision y no tin miedo di tuma decision. Tuma nan bon y corecto, si! percura pa un pueblo di San Nicolas, cu pa 40 aña desde cu LAGO a bay, nos refineria, cu tur hende a bringa pa haya un hotel, duna nan e oportunidad pa awe, por fin, San Nicolas ta bay haya oportunidad di come un poco di e bolo di turismo, cu pa 92% nos economia pabao y Noord Palm Beach, ta goza di dje”, Otmar Oduber a remarca.
“Ken por ta contra pa San Nicolas haya su hotel? Ken por ta contra cu e yiu di San Nicolas, cu ta biba den San Nicolas, por fin no tin cu subi un bus, cu ta 180 of 360 florin tur luna, pa bay traha na un hotel pabao, pero e por bay traha band’i su cas. E lo no perde dos ora den trafico”, Otmar Oduber a señala.
El a reitera cu ta di e cosnan aki mester ta papiando, manera el a ripiti tur e dianan aki.
