Parlamentario Marisol Tromp
ORANJESTAD (AAN): Parlamentario Marisol Tromp di fraccion di MAS, recientemente a nota con Minister di Finansa cu yen di fanfaria a publica con trempan e ta cu e presupuesto di Pais Aruba pa 2025, y cu asina e ta cumpliendo cu Ley di Contabilidad.
Segun Parlamentario Tromp, si di berdad e Minister kier cumpli cu e ley aki, e ora e lo mester a entrega tur e 5 cuentanan anual atrasa di Pais Aruba (jaarrekening) na Parlamento pasobra nan tur ta hopi laat.
Como e Minister di Finansa pa siete aña largo e la logra di entrega solamente 2 jaarrekening, esunnan di 2017 y 2018. Via un jaarrekening e pueblo por wak unda berdaderamente su placa ta bay!
E maneho financiero di mr. Xiomara Maduro como Minister di Finansa a wordo caracterisa door di ex-Secretario di Estado Van Huffelen (den su rapport Beleidsevaluatie Protocollen Aruba-Nederland y carta na Parlamento di Hulanda) como uno ZWAK.
Cu esaki e secretario di estado ta indica y estabelece cu e liderazgo di mr. Maduro pa por administra finansa publico a keda deficiente y cu e informacion raporta pa cual Minister Xiomara Maduro ta responsabel, no ta amplio y no ta confiabel tampoco! Lamentablemente e promesa di e Minister pa fortifica e capacidad di su departamento no a wordo cumpli cune tampoco.
.
