Parlamentario Shailiny Tromp-Lee:
ORANJESTAD (AAN): "Awe, 11 december, nos ta tratando e presupuesto supletorio 2023, esta e cambionan riba e presupuesto 2023 cu Parlamento a aproba na november 2022. Nos cifranan macro economico presenta den e di 2 Nota di Cambio sigur ta keda indica cu nos recuperacion ta bayendo miho cu a keda proyecta. Esaki nos por a lesa tambe caba den e prome Nota di Cambio cu nos a haya y den e Najaarsnota cu Gobierno a entrega na Parlamento dia 20 di october 2023", asina Parlamentario di MEP, Shailiny Tromp-Lee a indica.
Durante e reunion Gerlien Croes a insinua cu a logra e resultadonan aki y e meevallernan door di solamente ranca placa di pueblo. Ami sigur no ta di acuerdo cu Gobierno solamente a logra e desaroyo aki door di a ranca mas placa for di pueblo! Pa mi ta keda subraya un maneho responsabel caminda claramente ta tuma e decisionnan necesario pa por cumpli cu pago di e debe crea pa Mike Eman y AVP y tambe e debe realisa pa por a maneha e pandemia y e interes mara na esakinan. Mas cu claro mester sigui maneha e pais aki pa logra cu e resultadonan macro economico ta keda traduci na beneficionan concreto pa nos famianan. Aki ainda Gobierno ta trahando duro pa realisa e meta aki.
Enberdad Gobierno a introduci bbo na frontera y a aumenta bbo entrante di januari e aña aki. Loke mi no por compronde ta cu oposicion mester sigui hunga riba emocion di pueblo lubidando di bisa tambe na ki manera Gobierno a brinda compensacion caminda a tene cuenta cu e poder di compra di nos hendenan y pa yuda nan absorba e consecuencianan negativo di inflacion y precion fiscal.
Ta bon pa accentua e realidad aki tambe pasobra e ta un realidad. Gobierno a baha tarifa di inkomsten en loonbelasting y asina nos hendenan por mantene mas placa den cartera. Tambe a hisa e belastingvrije voet di Afl. 30.000 pa Afl. 36.000, cual suma di salario nos no mester paga belasting riba dje y asina tambe a percura pa nos mantene mas placa den nos cartera.
Adicionalmente a brinda sosten na e gruponan mas vulnerabel door di entre otro aumenta reparatietoeslag pa nos grandinan, aument pensioen di biehes, y a individualisa e AOV-uitkering den inkomstenbelasting pa asina tambe tene cuenta cu nan poder di compra. Mas cu claro mester enfatisa cu Gobierno a aumenta e salario minimo conforme e situacion inflatorio. Y pa finalisa ta bon pa remarca cu pa e comerciante tambe Gobierno a percura pa “alivio” door di baha e tarifa di winstbelasting di 25 pa 22% y a hisa e investeringsaftrek na 10% dunando sigur e comerciante espacio adicional. Tur esakinan oposicion ta lubida di menciona.
Sigur e aumento di entrada di gobierno pa diferente impuesto ta hustificabel y tin su debido splicacion! Si nos coy por ehempel loonbelasting y inkomstenbelasting nos por conclui for di cifranan di SVb cu nos conoce un subida substancial di e cantidad di hende inscribi na SVb. Te cu juli 2023 nos tin 43.518 persona registra, na december 2020 esaki tabata 39.858, na 2021 41.251 persona y 2022 42.179 persona. Un aumento di 3660 persona di dec 2020 pa awor. Mas hende a subi mercado laboral y mas cu claro mas hende ta paga loon- y inkomstenbelasting. Esaki ta ranca placa di pueblo?
Mi no ta compronde cu tin hende por cuestiona cu entrada di gobierno a subi riba diferente tereno pasobra pa mi nan ta refleha desaroyonan positivo y cu nos pais ta riba un bon caminda di recuperacion. Un biaha mas ta keda enfatisa cu ta critica pa critica sin tuma tempo pa berdaderamente analisa e cifranan presenta pa gobierno y instancianan renombra. Beneficio personal y di partido ta keda nan enfoke hibando un oposicion di critica destructivo na lugar di presenta un solucion of indica con otro abo lo a haci e cosnan, Tromp-Lee a expresa.
