Parlamentario Tromp-Lee (MEP):
ORANJESTAD (AAN): Durante tratamento di Presupuesto Supletorio un biaha mas AVP kier urgi Gobierno pa tuma accionnan popular pasobra nan sa cu nan ta crea simpatia di pueblo.
Realidad ta cu ora nan tabata na mando pa 8 aña consecutivo nan mes no a haci esakinan debidamente. Contrario na Gabinete Wever-Croes cu si a bin, no obstante e retonan financiero y tur e problemanan door di e pandemia, ta crea un balans entre un maneho financiero sostenibel responsabel y pone e hende central. Cu no ta nada facil ta un hecho pero ningun momento ta perde e balans aki for di bista.
Nos tur lo kier pa cosnan tuma lugar mas lihe, lastimamente e desaster financiero laga atras pa Mike Eman y e debenan cu mester a haci pa maneha e pandemia y brinda alivio ta haci cu esaki no ta posibel. Debenan di Mike Eman nos ta caba di paga te dia cu mi persona ta cumpli 70 aña, esta na aña 2044.
Ta un lastima cu na un manera hopi simplistico AVP ta keda sugeri sin mas pa aumenta bijstand, reparatietoeslag y salario minimo. AVP ta haci manera cu no tin procesonan pa keda encamina y ley pa cumpli cu nan. No ta asina facil manera ta keda sugeri. Como ehempel por menciona salario minimo cu su aumento y proceso ta ancra den ley, esta tin regla y condicionnan. No obstante esaki ta bon pa enfatisa cu compara cu partido AVP, cu semper a maneha den tempo di bonansa, partido MEP a aumenta e salario minimo na mas ocasion cu AVP y pa sumanan total mas cu tabata e caso bou di maneho di AVP.
Pasobra ta bon pa pueblo realisa cu durante e 8 añanan, 2009-2017, cu AVP tabata den gobierno nan a hisa e salario minimo total cu solamente Afl. 134,70. Anto esaki mientras nan tabata conoce e realidad di nos hende y famianan e tempo ey. Esaki contrario cu MEP cu di 2002-2009 a aumenta e salario minimo cu Afl. 431,15 en total y di 2018 pa awor Gabinete Wever-Croes 1 y 2 den 6 aña di tempo ya a aumenta e minimumloon cu Afl. 182,25. Esaki ta mas cu AVP a duna esnan mas vulnerabel den 8 aña di tempo.
Ta cu ki cara AVP kier bin papia awe di salario minimo y otro medio pa yuda pueblo manera reparatietoeslag cu pa ta concreto MEP a hisa recientemente. Pueblo sea critico y no laga AVP tuma boso haci. Papia bunita a para bira e ‘trademark’ di Mike Eman y AVP. Pasobra nos tur sa cu loke sigur nan falta ta curashi y determinacion, sin lubida e habilidad pa maneha su pueblo responsablemente.
