Parlamentario Rocco Tjon:
ORANJESTAD (AAN)- Parlamentario Rocco Tjon, di fraccion di MEP, den entrevista cu DIARIO a relata cu e maneho cu e gobierno anterior tabata hiba, ta cu tur Diabierna mainta nan tabata reuni cu Sindicato di Polis, pa atende nan preocupacionnan.
“Te hasta tin bez Sindicato di Polis tabata yama mi, y nan tambe por confirma esaki. Bo sa Minister, nos no tin e necesidad di sinta cu bo e siman aki’. Anto, ora Sindicato di Polis ta splica bo den e sala aki, cu apenas dos of tres reunion nan a haya cu e Minister, anto ta coffie nan a bebe pero no a haya feedback riba nada, material no ta yega mas, uniform no tin, bullet proof vest ainda nan no por cumpra e nobonan. Durante e prome luna cu nos tabata na mando, nos a percura pa bullet proof vestnan nobo di biaha pa full Cuerpo Policial, cu participacion di polis mes. Awo bo ta casi dos aña na mando y ainda bo no por a cumpra vest pa nan, uniformnan no ta yega. Sindicato mes ta bisa nos akiden, e magazijn ta un size di uniform tin”, Parlamentario Tjon a señala.
El a señala cu ora bishita aworaki e wardanan di polis, y awo tin un video ta circulando, por wak e wardanan ta scur, preto, no tin ni placa pa percura pa iluminacion. “Ami, en todo caso, ta preocupa cu e siguiente proyecto cu ta bay sali perhudica di e mal maneho di falta di prioridad, e falta di maneha na un forma responsabel, y tambe e falta di duna husticia prioridad financiero. E siguiente proyecto cu lo ta na peliger ta e camaranan; cu ta un proyecto sumamente grandi, cu nos a percura tambe pa tur licencia ta paga. E añanan cu e gobierno aki, lo ta den funcion, awe e proyecto aki tambe ta na peliger, pasobra tin diferente parti financiero cu e gobierno aki no ta cumpliendo cu ne”, Tjon a remarca.
E Parlamentario a bisa cu ora cu e papia di cambio di maneho financiero, gobierno tabata tin algun siman atras un fondo di inversion di 59 miyon florin.
Cero florin a bay pa Husticia, pa Cuerpo Policial den e caso aki; cero florin a bay pa combati criminalidad. “Unico placa cu a bay pa Husticia tabata pa mantene KIA, pasobra hasta e proyecto duradero cu nos tabata tin cu UNOPS (Oficina Nacionnan Uni) pa traha un prison nobo, nan a pare aworaki. Paso un, cu nos a ehecuta a wordo presenta na e Parlamento aki, gobierno mester a tuma un decision pa paso 2 y paso 3, pa nos por yega na un prison nobo, esey tambe a wordo para.
E proyecto cu tabata hinca den e fondo di inversion, cu tabata pa cumpra un boto di polis nobo, pa di e forma ey no solamente nos por a garantiza mas seguridad den nos frontera, y pa nos cumpli tambe cu obligacionnan internacional pa cruseronan por bin Aruba, e unico proyecto di 1.8 miyon florin, e dia prome cu e reunion aki a tuma lugar, nan a trece un nota di cambio y a kita e proyecto aki tambe for di e proyectonan di fondo di inversion. Kiermen, tin un cambio di maneho obviamente. Realidad ta cu nos a traslada un sector di husticia cu tabata conoce cu Pais Aruba tabata e pais mas safe den e region Caribense, y esaki a wordo confirma internacionalmente. Y awe nos no ta e pais di mas safe mas, y mi ta kere, nos tur ta sinti esaki den nos dianan diario”, Parlamentario Rocco Tjon a remarca.
