MEP ta sostene parteranan:
ORANJESTAD (AAN): Parlamento a reuni cu Partera Daal, representando e asociacion di parteranan. Den e reunion Partera Daal a presenta e retonan serio cu e parteranan ta confrontando pa algun luna caba. Evelyn Wever-Croes a expresa, den nomber di fraccion MEP, su sosten na e lucha di e asociacion di partera contra falta di solucion di Gobierno y AZV.
Di 1.300 parto na 2015, Aruba a baha pa 825 na 2025. Pero mientras e demanda ta baha, e necesidad pa atencion 24 ora no ta desaparece. Locual ta alarmante ta cu e cantidad di partera a baha di 8 na 2024 pa 4 na 2025, y na 2027 por keda solamente 3, mientras Aruba mester di sigur 6 pa 7 pa atende e demanda actual.
Desde April 2024, parteranan a busca solucion y a haci proposicionnan, pero ainda no a resulta den un acuerdo. Na momento cu e problema a ser presenta na ex minister di salubridad Dangui Oduber, e contesta di AZV tabata cu no tin fondo. Pues Gabinete Wever-Croes a dedica na crea fondo, y a laga e fondo di AZV solido na maart 2025. Ta di lamenta cu den e ultimo aña y mey, cu fondo disponibel, ainda no por a yega na un solucion.
Sin continuidad, stabilidad financiero y bon condicion laboral, cansancio y burnout ta bira un riesgo serio pa calidad y siguridad di atencion.
MEP ta exigi accion urgente y a pidi Parlamento pa yama e minister y AZV den Parlamento pa duna cuenta y presenta solucion concreto. Dos bida ta depende di e cuido aki di partera: di e mama y di e baby. Aruba no por sigui warda.
{gallery}Dos bida ta den nan man, pero gobierno y AZV no ta duna nan atencion{/gallery}
