Parlamentario Evelyn Wever-Croes:
- El a entrega carta na Presidente di Parlamento
ORANJESTAD (AAN) Parlamentario Evelyn Wever-Croes, Lider di Partido MEP, den entrevista cu DIARIO a comenta cu Aruba ta bibando den un temporada dificil, di hopi reto, ora ta trata di democracia den Parlamento.
“De por si, nos tin un gobierno cu den seis luna no ta duna mucho informacion, no ta contesta preguntanan di Parlamento y awo ta bin acerca cu dos biaha pa aña cu CAft ta bin Parlamento pa duna informacion, nan a cancela esun di e aña aki. Kiermen nos ta wardando pa CAft bin, pero e reunion a wordo cancela door di Presidente di Parlamento, supuestamente pasobra tin un delegacion di diez persona na Hulanda pa IPKO”, Wever-Croes a indica.
E ta reconoce cu reunionnan na IPKO ta importante, pero aun tin diesun Parlamentario aki na Aruba y e Vice-Presidente di Parlamento señora Muzaninn Wever, por a guia e reunion aki.
“Nos ta na spera di e reunion pa nos por haya informacion veridico y real di e finanzanan di Aruba, y aworaki E ta KITA for di nos. Cu e actuacion aki Presidente di Parlamento, ta stroba Parlamento di Aruba haci su trabao, ta stroba nos di haci nos trabao, y esey ta algo cu nos ta lamenta, y esaki nos a expresa den un carta tambe na su persona. Nos ta bibando den un tempo cu casi ta parce censura, gobierno no ta duna informacion, gobierno ta firma un Rijkswet sin informa ni un hende, gobierno no ta contesta preguntanan di Parlamento, ni di MEP pero tampoco di AVP y Futuro.
“Anto cosnan importante cu nos ta pidi y puntra gobierno, por ehemplo un di nan ta edad di pensioen, pasobra den e Landspakket nos sa cu ta haciendo un estudio, riba e tema di edad di pensioen y nos tin miedo cu e gobierno aki, e falta di transparencia y e censura cu nan ta aplica, un djis ta tuma decision, yega na un acuerdo Hulanda pa hisa edad, sin papi’e cu ningun hende. Nos a pidi e reunion ey pero e no ta wordo yama”, Parlamentario Evelyn Wever-Croes a señala.
Wever-Croes a agrega cu e lidernan di fraccion di AVP y di Futuro, señora Jennifer Arends-Reyes y señora Ruthlyn Lindor, respectivamente, a purba di tur manera y MEP tin prueba di esey, di stroba fraccion di MEP di papia y hiba palabra, y haya informacion.
“Pues, esaki ta e temporada cu nos ta bibando aden, sikiera dos bez pa aña CAft, cu ta un instituto independiente ta bin Parlamento duna informacion tambe ta wordo nenga. Kiermen, nos no ta haya informacion di gobierno ni por haya informacion di institutonan independiente tampoco. Esaki ta algo cu nos ta condena y ta rechaza, y e lo no keda te akinan”, Parlamentario y lider di Partido MEP, ampliamente a relata.
