Parlamentario Evelyn Wever-Croes:
ORANJESTAD (AAN) Parlamentario y Lider di fraccion di Partido Movimento Electoral di Pueblo (MEP), den entrevista cu Matutino DIARIO, a declara cu Gobierno di AVP cu Futuro, specificamente señor Mike Eman, a entrega e Rijkswet di HOFA, sin cu ningun hende tabata sa, sin cu a consulta cu Parlamento.
“Nos a sinti den comunidad un rechazo, preocupacion, un ansia, un rabia…Pa por canaliza e sentimento aki na un bon forma, nos a cuminza cu un accion di firma, y na tur esnan cu kier a expresa nan mes, nan no tin nodi keda carga cu ne, of haci otro cos, pero nan por firma y bisa pakico nan no ta di acuerdo.
“Mi mester bisa cu den e prome fase di accion di firma, den tres siman, a duna 6.424 firma. 6.424 bos di mama y tata di famia cu ta expresa nan descontento y rechazo pa locual gobierno di AVP-Futuro a haci. 6.424 bos di mama y tata di famia, cu ta pidi pa no mishi cu e autonomia di e pais aki, mirando e progreso y bienestar cu autonomia a trece pa nos pais, Wever-Croes a expresa tambe cu 6.424 ciudadano cu ta rechaza e actuacion di gobierno, specialmente di señor Mike Eman”, Parlamentario Evelyn-Wever-Croes a remarca.
“Mi ta felicita y ta gradici tur esnan cu a expresa nan bos y a participa na e accion di firma. 6.424 firma den tres siman ta bisa bo hopi. Accion di firma ta continua te ora cu gobierno bin den Parlamento y duna cuenta”, Parlamentario Wever-Croes a bisa.
El a indica cu tur hende por pasa firma tur atardi p’asina por firma e accion di firma, of por haci’e online.
