Marisol Tromp, Lider di MAS:
ORANJESTAD (AAN) – Parlamentario Marisol Tromp, Lider di Partido MAS, den entrevista cu DIARIO a cuestiona cu presupuesto a drenta den Parlamento, comosifuera cu e ta basa den RAft y cu gobierno mester a hinca e normanan caba den e presupuesto.
“E ta un presupuesto cu ta segun RAft pero di otro banda Gobierno no kier e RAft, kiermen e ora ey no ta realistico mas. Di otro banda ta, cu gobierno no kier baha su gastonan structuralmente, y esey ta loke nos ta wak den e cartanan di CAft, cada vez. Nos fraccion ta propone pa cumpli cu e normanan y e forma con nos ta propone esaki ta, bay di acuerdo cu e RAft. Lo bo por haci cierto adaptacionnan na dje pero mantene na esey”, Tromp a señala.
“Tweede Kamer y Hulanda a papia!” Asina e lider di MAS a agrega. “Nan a duna instruccion cu nan kier un rijkswet y cu tur e nombernan aden. Bo por dune e nomber cu bo kier, pero nan a duna condicionnan p’e”, Marisol Tromp a indica, y a expresa cu mas tempo pasa, mas Aruba ta bay paga; e porcentahe ta bira mas halto y nos ta termina pagando mas; e placa ta bay, e ora ey, a costo di otro cosnan cu tambe ta importante”, e lider di MAS a subraya
E Parlamentario a remarca cu ya a pasa tres aña cu Minister Presidente a firma pa e RAft dos, tres biaha caba. “Y manera mi ta bisa, e ta papia cu dos lenga; un ta contra dje y otro banda cu e mester bin. Kiermen, e ta keda postpone y mas bo postpone mas e suma ta bay subi, y e condicionnan no ta faborable pa nos pueblo pagador di belasting”, Tromp a señala.
Te cu aworaki, entrada pa caha di gobierno ta bin sea di turismo of di cobra pueblo hala di belasting. Esaki ta locual ta pasando aworaki, Marisol Tromp, lider di MAS, a remarca. Por tabata tin otro manera, segun e dama a señala. “Nos a wak programanan di partido cu yen di proposicion, pero realidad ta cu nos tin un Landspakket y esey tin cu mantene na dje. Y mi ta kere cu si a cumpli cu tur loke a worde pidi for di tanto aña pasa, entre otro pa baha gasto di personal, na e momentonan aki nos lo no tabata hinca den e debacle aki. Nos posicion aworaki aki ta pa mas pronto posible firma e rijkswet (RAft), pa asina nos por cuminza na drecha loke nos tin cu drecha. Esey ta e esencia, bo tin cu drecha e situacion. Bo ta keda postpone, pa ken?” Lider di MAS, Marisol Tromp, a conclui.
