Gerlien Croes, Parlamentario Independiente:
ORANJESTAD (AAN) – Parlamentario Independiente Gerlien Cores, den entrevista cu DIARIO a trece dilanti cu Aruba ta keda confronta hopi reto, no solamente riba e aspecto financiero pero tambe den Parlamento mes.
“Ohala nos yega e dia cu nos wak cu enberdad ta eleva e nivel di Parlamento, cu tin hopi mas respet pa cu otro, pero alavez tambe cu interesnan personal ta y interesnan politico ta wordo poni un banda y cu nos ta traha enberdad, manera mester ta, pa comunidad”, Gerlien Croes a expresa.
El a agrega cu na momento cu tin un Parlamento cu ta funciona manera mester ta bo por bay por tambe, anda manera debe ser cu e retonan, entre otro, presupuestonan financiero cu na e momentonan aki ta crea hopi duda, no solamente pasobra e ta traha a base di interes di fianza cu no ta conoci ainda kico ta bay wordo acorda cu Hulanda; un interes di 3.2% cu ta basa riba un rijksbijdrage, cu gobierno kier cambia aworaki pa un otro rijkswet, mientras cu Hulanda ta propone atrobe pa haci un contrato cu Pais Aruba pa dos aña, na un interes di 5.2%. Y tur esaki ta costa Aruba placa, e parlamentario a bisa.
“Na final di dia, gobierno dos aña pasa a acorda pa firma pa un rijkswet y ta bende den comunidad cu e no kier bende e economia, pero Minister Presidente a haci esaki masha dia caba. Esey ta e realidad! Y den e rijkswet aki, ta ofrece Aruba un 3.2% cual ta haci un diferencia di casi 40 miyon na interes pa aña, den e proximo dos añanan. Y na final di dia, no mester lubida cu cada gasto extra na interes ta pueblo ta paga. Ta e impuesto cu nan ta cobra, e BBO cu despues ta subi pa comunidad y enberdad no ta dunando e resultado economico ni financiero pa e pais aki manera mester ta”, Gerlien Croes a señala.
