Presidente di Parlamento Marlon Sneek:
ORANJESTAD (AAN): Presidente di Parlamento Marlon Sneek a afirma cu e Ley di Hofa lo bin Parlamento pa keda trata. El a menciona cu e ley a bay pa Raad van State y na momento cu e advies di Raad van State sali, mirando cu ta trata di un ley di Reino, tur Parlamento di Reino lo ricibi e ley di Reino aki pa haci nan preguntanan riba e ley y Parlamento di Aruba ta haya tempo pa prepara y debati riba esaki. Si e yega asina leu cu e mester bay Tweede Kamer, Aruba por manda delegacion pa hiba debate na momento cu trata e ley na Hulanda.
Presidente Sneek a remarca cu esaki ta un consensus Rijkswet, un consenso entre e gobiernonan, manera den pasado otro gobiernonan tambe a firma. Aki gobierno cu gobierno ta negocia. Parlamento tin su rol, segun Landsverordering y den e debate na Hulanda.
Presidente di Parlamento a remarca cu na e momento aki tin un landsverordening cu e mesun structura, mester haya advies di CAFt prome cu trata presupuesto, despues e mester bay bek CAFt pa aprobacion. E structura aki lo sigui pero enbes di e landsverordening so, ta bay den e landsverordening hunto cu e rijkswet.
El a remarca cu e landsverordening cu Aruba tawata conoce a madura na 2018 y na momento cu mester a renoba, algun parlamentario a scoge e caminda pa cambia e landsverodening. “Esaki a causa e bay bin cu tin awe entre Aruba y Hulanda y no tin e confiansa mas cu lo bay respeta un landsverordening y p’esey Hulanda ta pidi y opta pa bay cu un rijkswet. Esaki ta e realidad cu nos tin”, e presidente di Parlamento a remarca.
Si Aruba lo perde independencia financiero, El a enfatisa, cu Aruba ya ta bou supervision caba y Aruba ta depende di CAFt cu lo keda. “Loke nos ta den dje awo, lo no bay tin mucho cambio. E unico cambio ta bira cu den luga di landsverordening e lo bira un ley di Reino y e tema di discusion mester bira con esaki lo ser hinca den otro”, Presidente di Parlamento Marlon Sneek a indica.
